नेप्सेमा तीन कम्पनीको बोनस सेयर सूचीकृत

काठमाडौं–नेपाल स्टक एक्सचेन्ज (नेप्से) मा ३ कम्पनीको बोनस सेयर सूचीकृत भएको छ। नेप्सेमा शिवम् सिमेन्ट, साइन रेसुंगा विकास बैंक र नेपाल इन्स्योरेन्सको बोनस सेयर सूचीकृत भएको हो।
बोनस सेयर सूचीकृतसँगै लगानीकर्ताले डिम्याट खातामा आएको सेयर बिक्री गर्न सक्नेछन्।
शिवम् सिमेन्टको १४.२५ प्रतिशत बोनस सेयर अर्थात् कुल ६२ लाख ७० हजार कित्ता बोनस सेयर सूचीकृत भएको छ। साइन रेसुंगा डेभलपमेन्ट बैंकको १०.५० प्रतिशत अर्थात् ४४ लाख ९८ हजार ७७ कित्ता बोनस सेयर सूचीकृत भएको छ।
यस्तै, नेपाल इन्स्योरेन्सले यसअघि सर्वसाधारणलाई दिएको १० प्रतिशत अर्थात् १४ लाख ९४ हजार ७६६ कित्ता बोनस सेयर सूचीकृत भएको हो।

१४ केजी सुन तस्करी प्रकरणमा कलेज सञ्चालक गुरुङ पक्राउ
काठमाडौं– नेपाल प्रहरीको केन्द्रीय अनुसन्धान ब्युरो (सिआइबी)ले सुन तस्करी प्रकरणमा कलेज सञ्चालकलाई पक्राउ गरेको छ।
सिआइबी टोलीले पर्वत फूलबारी–२ घर भएका काठमाडौंको डिल्लीबजार कालिकास्थानस्थित प्लाटिनम कलेजका कार्यकारी अध्यक्ष जीवनकुमार गुरुङलाई १४ केजी सुन तस्करी प्रकरणमा पक्राउ गरेको हो।
दुबईबाट १४ किलो सुन तस्करी गरेर ल्याएको घटनाको छानबिन र अनुसन्धानका क्रममा गुरुङ योजनाकार रहेको पत्ता लागेपछि गुरुङलाई सामाखुसीबाट पक्राउ गरिएको सिआइबी प्रवक्ता तथा प्रहरी उपरीक्षक होबिन्द्र बोगटीले जानकारी दिए।
उनले भने, ‘दुबईबाट १४ किलो सुन तस्करी गरेर ल्याएको घटनामा पक्राउ पुर्जी जारी भएपछि फरार गुरुङ आज पक्राउ परेका हुन्।’ गुरुङलाई भन्सार कार्यालयको जिम्मा लगाउने तयारी छ।