कोरोना उपचारमा शुल्क, संघविरुद्ध उभिए प्रदेश सरकार

संघीय सरकारले कोरोना भाइरस लागेका बिरामी मृत्यु शैयामा पुगे पनि निःशुल्क उपचार नगर्ने बताइरहेका बेला प्रदेश सरकारहरूले भने निःशुल्क उपचार गर्ने चुनौती दिएका छन् ।
प्रदेश १ सरकार र लुम्बिनी प्रदेश सरकारले संघीय सरकारलाई चुनौती दिँदै निःशुल्क उपचारको घोषणा गरेका हुन् । लुम्बिनी प्रदेशका मुख्यमन्त्री शंकर पोखरेलले लक्षण देखिएका संक्रमितको निःशुल्क उपचार जारी रहेको बताएका छन् ।
‘लुम्बिनी प्रदेशका ४ वटै कोरोना विशेष अस्पतालमा लक्षण देखिएका बिरामीका लागि निःशुल्क उपचारको व्यवस्था यथावत रहेको छ,’ मुख्यमन्त्री पोखरेलले सामाजिक सञ्जाल फेसबुकमा लेखेका छन् ।
प्रधानमन्त्री केपी ओली नेतृत्वको सरकारले प्रचलित संविधान र जनस्वास्थ्य ऐन, ०७५ को उल्लंघन गरेर कोरोनाबाट मर्नै लागेका बिरामीको पनि उपचार नगर्ने निर्णय गरेलगत्तै मुख्यमन्त्री पोखरेलले यस्तो घोषणा गरेका हुन् ।
प्रदेश १ को सामाजिक विकास मन्त्रालयका सचिव गोविन्दबहादुर कार्कीका अनुसार प्रदेश सरकारले सञ्चालन गरेको कोसी अस्पतालमा कोभिड–१९ उपचार केन्द्रमा शुल्क लिने निर्णय भएको छैन ।
संघीय सरकारको नयाँ निर्णयपछि शुल्क लिने÷नलिने विषयमा छलफल नभएको जानकारी उनले दिए । उनले भने, ‘यो अस्पतालको हकमा पुरानै निर्णय कायम छ ।’