विदेशमा अलपत्र श्रमिकको राहतका लागि दूतावासले पाए ८० लाख

लकडाउन अवधिमा स्वदेश फर्कन नसकेर समस्यामा परेका नेपालीको लागि ८० लाख रुपैयाँ रकम पठाइएको छ ।
देशमा लकडाउन भएको र घर फर्कन अन्तर्राष्ट्रिय उडान पनि बन्द भएकाले अलपत्र परेका नेपालीको राहत र उद्धारका लागि खाडी र मलेसियाका नेपाली दूतावासले मागअनुसार ८० लाख रुपैयाँ रकम पठाइएको वैदेशिक रोजगार बोर्डले जनाएको छ ।
दूतावासले मागेअनुसार मलेसियामा १० लाख, यूएईमा २० लाख, साउदी अरेबियामा ३५ लाख र बहराइनमा १५ लाख गरी ८० लाख रुपैयाँ पेस्की पठाइएको हो । यो रकम दूतावासले माग गरेपछि साउनमा पठाइएको हो ।
मलेसियामा घरफिर्ती केन्द्रमा रहेका ८६ नेपाली श्रमिकको स्वदेश फिर्तीका लागि हवाई टिकट काट्न ३० लाख रुपैयाँ पठाइएको छ । दूतावासले माग गरेअनुसार नै ३० लाख रुपैयाँ परराष्ट्र मन्त्रालयमार्फत पठाएको बोर्डले जनाएको छ ।
बोर्डका अनुसार अन्य दूतावासमा समेत प्रमाणित विवरण पठाउन समन्वय र सहकार्य भइरहेको छ ।
साउनमा विदेशबाट उद्धार गरी ल्याइएका र होल्डिङ सेन्टरदेखि घरसम्म पुग्न नसक्दा अलपत्र परेका १ सय ८७ जना श्रमिकको खर्च पनि बोर्डले बेहोरेको छ । उनीहरुको यातायातलगायतका लागि १ लाख ९७ हजार १ सय रुपैयाँ खर्च भएको बोर्डले जनाएको छ ।