नेताहरूको कार्यविभाजन गर्दै ओलीको अपील– निराश नहुनु, पार्टी पुनर्गठन हुन्छ
नेकपा एमालेका अध्यक्ष केपी शर्मा ओलीले पार्टी पुनर्गठन तथा पुनर्जागरणको कार्ययोजना अघि बढाइने बताएका छन्।
एमाले सचिवालयको जेठ ८ देखि १० गतेसम्म बसेको बैठकका निर्णय कार्यान्वयन गर्न जारी गरिएको अन्तरपार्टी निर्देशन (अपानी) मार्फत् ओलीले यस्तो बताएका हुन्।
ओलीले निर्वाचनमा व्यहोर्नुपरेको गम्भीर पराजयका कारण पार्टीको एक हिस्सा निराश र पलायन हुन खोजेको उल्लेख गर्दै पार्टीपंक्तिमा आशा र उत्साह जगाउन आवश्यक रहेको बताएका छन्।
‘निर्वाचनमा व्यहोर्नुपरेको गम्भीर पराजयका कारणले पार्टीको एउटा हिस्सा निराश र पलायन हुन खोजेको अवस्था छ। यसप्रकारको अवस्थामा सुधार ल्याउनु र पार्टीपंक्तिमा आशाको सञ्चार जागृत गर्नु आवश्यक छ,’ अपानीमा भनिएको छ।
उनले पार्टी समीक्षा प्रक्रियामा रहेको उल्लेख गर्दै आगामी केन्द्रीय कमिटी बैठकबाट पार्टी पुनर्गठन र पुनर्जागरणको कार्ययोजना अघि बढाइने बताएका छन्।
