पहिरोले घर पुरिँदा गुल्मी, बागलुङ र स्याङ्जामा गरी ९ जनाको मृत्यु

काठमाडौं–मनसुन सुरु भएसँगै नेपालभर पानी परिरहेको छ। शुक्रबारको निरन्तरको वर्षाले गुल्मीसहित स्याङ्याजा र बाग्लुङमा पहिरो जाँदा ९ जनाले ज्यान गुमाएका छन्। बागलुङमा पहिरोले घर पुरिँदा दुई जनाको मृत्यु भएको छ। उक्त घटनामा दुई जना घाइते भएका छन्। गलकोट नगरपालिका–८ काँडेबाँसका बिसौनीका ५५ वर्षीय प्रेम विक र उनकी श्रीमती ५० वर्षीया वसन्ती विकको मृत्यु भएको हो। पहिरोले घर पुरिँदा प्रेमकी बुहारी कुमारी र नाति शिशिर घाइते भएका जिल्ला प्रहरी कार्यालय बागलुङका सूचना अधिकारी एवं प्रहरी नायब उपरीक्षक विजय यादवले जानकारी दिए।
शुक्रबार गए राती ३ बजे पहिरो गएको गलकोट नगरपालिका–८ का वडासदस्य लोकनाथ कँडेलले बताए। घाइतेलाई उद्धार गरी अस्पताल पठाइएको छ। यस्तै, स्याङ्जामा पहिरोले घर पुरिँदा आमा–छोरीको मृत्यु भएको छ । शुक्रार राती स्याङ्जाको फेदीखोला गाउँपालिका–५ बांगेमा पहिरोले घर पुरिँदा उनीहरुको मृत्यु भएको हो।
राती सुतेका बेला आएको पहिरोमा परेर आमा ३१ वर्षीया दुर्गा जिटी र उनकी तीन वर्षीया छोरी निकिसाको मृत्यु भएको घटनास्थलमा रहेकी प्रहरी सहायक निरीक्षक अमृत भुजेलले बताइन्। घटनाका बेला आमाछोरी मात्र घरमा रहेका र छोरो गाउँमा आफन्तकहाँ बास बस्न गएकाले उनको ज्यान जोगिएको छ।
पहिरोले ढुंगामाटो र जस्तापाताले छाएको एकतले घर र घरनजिकै रहेको गोठ पुरिएको छ। पहिरोमा परी एउटा भैँसी पनि मरेको प्रहरीले जनाएको छ। यसैगरी गुल्मीको मालिका गाउँपालिकामा निरन्तरको वर्षापछि आएको पहिरोमा पुरिएर एकै घरका पाँच जनाको अकाल मृत्यु भएको छ।
मालिकाको वडा नम्बर ६ ठाँटीपोखरीमा पहिरोले घर पुरिँदा एकै परिवारका पाँच जनाले ज्यान गुमाएका हुन्। शुक्रबार रातीदेखि परेको निरन्तर वर्षापछि आएको पहिरोले मालिका–६ कँडेलपाटामा भेषबहादुर कामीको पुरिँदा एकै परिवारका ५ जनाको मृत्यु भएको पालिका अध्यक्ष देवीराम अर्यालले बताए।
पहिरोमा ५५ वर्षीय घरमुली भेषबहादुरसहित उनकी श्रीमती ४८ वर्षीया सुन्तली विक, बुहारी २६ वर्षीया सीता विक, नातिनी ८ वर्षीया सपना र ८ महिनाकी विपना विकको ज्यान गएको जिल्ला प्रहरी कार्यालय गुल्मीका प्रहरी निरीक्षक सूर्यभान चौधरीले जानकारी दिए।