भ्रष्टाचार आरोपमा मुख्यसचिव अर्याल निलम्बित भएपछि गड्तौलालाई निमित्तको जिम्मेवारी

काठमाडौं–। सरकारले अख्तियार दुरुपयोग अनुसन्धान आयोगले आइतबार भ्रष्टाचार आरोपमा विशेष अदालतमा मुद्दा दायर गरेपछि निलम्बनमा परेका मुख्यसचिव बैकुण्ठ अर्याललाई राष्ट्रिय योजना आयोगमा विशेष पद सिर्जना गरेर सरुवा गरेको छ। आज बसेको मन्त्रिपरिषद् बैठकले अर्यालले राजीनामा नदिएपछि उनलाई विशेष पद सिर्जना गरेर आयोगमा सरुवा गरिएको हो।
मुख्यसचिव अर्यालविरुद्ध अख्तियारबाट विशेष अदालतमा भ्रष्टाचारको मुद्दा दायर भएकाले कानुनबमोजिम स्वतः पदबाट निलम्बन भएको सरकारको प्रवक्तासमेत रहेकी सूचना तथा सञ्चार प्रविधिमन्त्री रेखा शर्माले जानकारी दिइन्।
‘सरकारका मुख्यसचिव अर्यालविरुद्ध अख्तियारबाट विशेष अदालतमा भ्रष्टाचारको मुद्दा दायर भएकोमा प्रचलित कानुनबमोजिम स्वतः निलम्बन हुनुभएको छ। हाललाई राष्ट्रिय योजना आयोगमा राजपत्रांकित विशिष्ट श्रेणीको मुख्यसचिवसरहको विशेष पद सिर्जना गरी उहाँलाई उक्त पदमा सरुवा गर्ने निर्णय मन्त्रिपरिषद् बैठकले गरेको छ’, उनले भनिन्।
मन्त्रिपरिषद् बैठकले निमित्त मुख्यसचिवको जिम्मेवारी लीलादेवी गड्तौलालाई दिने निर्णय गरेको छ।
प्रधानमन्त्री तथा मन्त्रिपरिषद कार्यालयमा कार्यरत वरिष्ठ सचिवमध्येबाट गड्तौलालाई निमित्त मुख्यसचिवको जिम्मेवारी दिइएको हो।
मुख्यसचिव अर्याल भ्रष्टाचार आरोपमा स्वतः निलम्बित भएसँगै प्रधानमन्त्री तथा मन्त्रिपरिषद् कार्यालयकी सचिव गड्तौलाले कामु मुख्य सचिवको जिम्मेवारी पाएकी हुन्।
बैठकले आव २०८०÷८१ मा स्थानीय तहलाई हस्तान्तरण हुन बाँकी वित्तीय समानीकरण अनुदानको रकम हस्तान्तरण गर्ने निर्णय गरेको छ। ८७ अर्ब ३५ करोड २९ लाख विनियोजन भएकोमा ९३ प्रतिशत हुने गरी बाँकी रकम १६ अर्ब ९९ करोड २२ लाख तत्तत् स्थानीय तहमा हस्तान्तरण गर्ने निर्णय भएको मन्त्री शर्माले जानकारी दिइन्।