आईसीसी टी–२०ः नेपाल पहिलो खेलमा नेदरल्यान्डसँग ६ विकेटले पराजित

काठमाडौं– आईसीसी टी–ट्वान्टी पुरुष विश्वकप क्रिकेट प्रतियोगितामा नेपाल पहिलो खेलमा नेदरल्यान्डसँग ६ विकेटले पराजित भएको छ।
नेपालले जितका लागि नेदरल्यान्डससामु १०७ रनको विजयी लक्ष्य प्रस्तुत गरेको थियो। सो लक्ष्य नेदरल्यान्डसले १८ दशमलव चार ओभरमा चार विकेट गुमाएर पूरा गरेको छ।
नेदरल्यान्डसका लागि म्याक्स ओडाउडले अविजित ५४ रन बनाए। उनले ४८ बल खेल्ने क्रममा एक छक्का र चार चौका प्रहार गरे। यस्तै विक्रमजित सिंहले २२, सेब्राण्ड एन्जेलब्रेचिटले १४ तथा बास डी लिडले अविजित ११ रन बनाए। बलिङतर्फ नेपालका लागि सोमपाल कामी, दीपेन्द्रसिंह ऐरी र अविनास बोहराले एक–एक विकेट लिए।
यसअघि अमेरिकाको डालासस्थित ग्रान्ड प्रेरी रंगशालामा नेदरल्यान्डसले टस जितेर फिल्डिङ रोजेपछि नेपालले पहिला ब्याटिङ गरेको थियो। नेपालले १९ दशमलव दुई ओभरमा सबै विकेट गुमाएर १०६ रन बनायो। नेपालका लागि कप्तान रोहितकुमार पौडेलले ३५ रन बनाए। उनले ३७ बल खेल्दै पाँच चौका प्रहार गरे। यस्तै करन केसीले १२ बलमा १७ रन जोडे। गुल्सन झाले १४ तथा अनिल साहले ११ रन बनाए।
बलिङतर्फ नेदरल्यान्डका टिम प्रिङगनल र लगन भान वीकले तीन तीन तथा बास डी लिड र मकेरेनले दुई दुई विकेट लिए। नेपालले अब आफ्नो दोस्रो खेल जेठ २९ मा श्रीलंकासित अमेरिकाको फ्लोरिडामा खेल्नेछ।