वैदेशिक रोजगारीमा रहेकालाई सर्वोत्तम सिमेन्टको आइपिओ बाँडफाँट

काठमाडौं– सर्वोत्तम सिमेन्टले वैदेशिक रोजगारीमा रहेका नेपालीलाई जारी गरेको आइपिओ बुधबार बाँडफाँट भएको छ।
कम्पनीले पहिलोपल्ट बुक बिल्डिङ विधिबाट जारी गरेको आइपिओमा गोलाप्रथामार्फत ५ हजार ३४० जनाले सेयर पाएका छन्।
उनीहरुले ५० कित्ताका दरले सेयर पाएका हुन्। आइपिओमा वैदेशिक रोजगारीमा रहेका ३३ हजार ८२४ जनाले आवेदन दिएकामा ३३ हजार ८१० जनाको आवेदन योग्य ठहरिएको थियो।
योग्य आवेदकमध्ये गोलाप्रथामार्फत ५ हजार ३४० जनाले सेयर पाएका हुन्। कम्पनीले वैदेशिक रोजगारीमा रहेकालाई प्रतिकित्ता ३६०.९० रुपैयाँका दरले २ लाख ६७ हजार कित्ता सेयर निष्कासन गरेको थियो।
बुक विल्डिङ विधिमा न्यूनतम ५० कित्ताका लागि आवेदन दिनुपर्ने व्यवस्था छ। सोहीबमोजिम न्यूनतम ५० कित्ताका दरले सेयर बाँडफाँट गरिएको हो। आइपिओको नतिजा बिक्री प्रबन्धक ग्लोबल आइएमई क्यापिटल, सह–बिक्री प्रबन्धक एनआइएमबी एस क्यापिटल र प्रभु क्यापिटलको वेबसाइटबाट हेर्न सकिने कम्पनीले जनाएको छ।