आईसीसी महिला टी–२०:नेपालको लगातार दोस्रो जित
काठमाडौं– आईसीसी महिला टी–२० विश्वकप एसिया क्षेत्र छनोटमा बहराइनलाई १० विकेटले हराउँदै नेपालले लगातार दोस्रो जित निकालेको छ।
पहिलो खेलमा मलेसियालाई ५ रनले हराएको नेपालले दोस्रो खेलमा बहराइनमाथि १० विकेटको सहज जित निकालेको हो।बहराइनले दिएको ३२ रनको झिनो लक्ष्य नेपालले २.५ ओभरमै भेट्टायो।ओपनर सीता राना मगर र काजल कुवँरले ३२ रनको साझेदारी गरेपछि नेपालले सहज जित निकालेको हो। कविता १७ र सीता २ रनमा नटआउट रहे।
त्यसअघि मलेसियाको क्वालालम्पुरस्थित वायोमास ओभलमा टस जितेर पहिले ब्याटिङ गरेको बहराईन १५.४ ओभरमा ३१ रनमा समेटिएको थियो।बहराइनलाई कम स्कोरमा रोक्न इन्दु बर्मा एक्लैले तीन विकेट झारिन्। कप्तान दीपिका रासंगिकाले बनाएको ११ रन नै बहराइनका लागि सर्वाधिक रह्यो।
समूह ‘ए’मा नेपालसँगै आयोजक मलेसिया, बहराइन, भुटान, कतार र यूएई छन्। समूह ‘बी’ मा चीन, हङकङ, कुवेत, थाइल्यान्ड र म्यानमार छन्।नेपालले समूह चरणको तेस्रो खेलमा आइतबार भुटानसँग खेल्नेछ। सोमबार कतार र समूह चरणको अन्तिम खेलमा बुधबार यूएईसँग खेल्ने कार्यतालिका छ।
समूहका शीर्ष दुई टोलीले सेमिफाइनलमा स्थान बनाउनेछन्। सेमिफाइनल खेल २२ भदौमा हुनेछ। फाइनल खेल २३ गते शनिबार हुनेछ।
फाइनलमा पुग्ने दुई टोलीले २०२४ मा हुने ग्लोबल क्वालिफायर खेल्नेछन्।
