नेपाललाई चीनको ३ लाख डोज कोरोना खोप

छिमेकी चीनले आफ्नै घर उत्पादन भएको कोरोनाभाइरसविरूद्धको खोप नेपाललाई अनुदानमा दिने भएको छ ।
काठमाडौंस्थित चिनियाँ दूतावासका अनुसार चीनले ३ लाख डोज कोरोना भ्याक्सिन छिट्टै नेपाललाई अनुदानमा दिने निर्णय गरेको छ ।
संसारभर र चीनभित्रै पनि ठूलो माग भए पनि नेपाल–चीन मित्रताको महत्वका कारण चीनले नेपाललाई भ्याक्सिन दिन लागेको दूतावासले बताएको छ ।
चीनले दिएको भ्याक्सिन १ लाख ५० हजार जना मानिसमा लगाउन मिल्नेछ ।
चीनले दिन लागेको भ्याक्सिन चिनियाँ कम्पनी सिनोफार्मले विकास र उत्पादन गरेको हो । यो भ्याक्सिनले चीनमा यसअघि नै ससर्त अनुमति पाइसकेको र जनवरी ३१ सम्म २ करोड ४० लाख मानिसलाई दिइसकेको दूतावासले जनाएको छ ।
खोपको प्रभावकारिता ७९.३४ प्रतिशत रहेको दाबी गरिएको छ ।
दूतावासले खोपको सुरक्षा र प्रभावकारिता विश्व स्वास्थ्य संगठनले बनाएको मापदण्डभन्दा माथि रहेको उल्लेख गरेको छ । अहिलेसम्म पाकिस्तान, इजिप्ट, हंगेरी, युएईलगायत १३ मुलुकमा भ्याक्सिनले आपतकालीन प्रयोगको अनुमति पाएको दूतावासले बताएको छ ।
नेपालमा भने चिनियाँ खोपलाई अहिलेसम्म अनुमति दिइएको छैन । दूतावासले नेपाली अधिकारीसँग खोपको अनुमतिका लागि संयोजन गरिरहेको र छिट्टै खोप नेपाललाई उपलब्ध गराउने बताएको छ ।
यसअघि गत साता भारतले नेपाललाई १० लाख डोज भ्याक्सिन अनुदानमा दिएको थियो ।