अस्ताए फुटबलका जादूगर म्याराडोना
एजेन्सी
अर्जेन्टिनालाई फुटबलबाट विश्वभर परिचित गराएका खेलाडी डिएगो म्याराडोनाको बुधबार निधन भएको अर्जेन्टिनामा तीन दिनको राष्ट्रिय शोक घोषणा गरिएको छ । ६० वर्षका म्याराडोनाले निधन भएको थियो ।
म्याराडोनाको पार्थिव शरीरलाई राष्ट्रपति कार्यालय कासा रोसारामा राखिएको छ भने त्यहाँ तीन दिनसम्म मानिसले श्रद्धाञ्जली अर्पण गर्नेछन् ।
म्याराडोनाका टिमका साथी ओहवाल्दो अर्बिलेसले जति मानसम्मान र प्रशंसा म्याराडोनाले पाए, त्यति आजका फुटबलका सुपरस्टार लियोनेल मेस्सी र क्रिस्टियानो रोनाल्डोले पनि नपाएको बताएका छन् ।
फुटबल जगत्का थुप्रै हस्तीले म्याराडोनालाई श्रद्धाञ्जली दिएका छन् । यीमध्ये मेस्सी, रोनाल्डोदेखि ब्राजिलका महान् खेलाडी पेलेसमेत छन् ।
पेलेले श्रद्धाञ्जलीमा भने, ‘मैले एक नजिकका साथीलाई गुमाएको छु र संसारले एक महान् खेलाडी गुमाएको छ । मलाई आशा छ, एक दिन हामी स्वर्गमा सँगै फुटबल खेल्नेछौं ।’
म्यान्चेस्टर सिटीका म्यानेजर पेप गुआर्डियेलोले म्याराडोनाले विश्व फुटबललाई थप उत्कृष्ट बनाएको बताएका छन् ।
अर्बिलेसले बीबीसीसँगको कुराकानीमा भने, ‘म्याराडोना असाध्यै उत्कृष्ट थिए । तर, उनले त्यति सजिलै यी सब हासिल गरेका होइनन् । जीवनको सुरुवाती दिन म्याराडोनाका लागि निकै कठिन थिए । उनको बाल्यकाल कुनै साधारण बच्चाको जस्तो थिएन र किशोरावस्था पनि सामान्य थिएन । जो कोही उनीसँग हुन चाहन्थे, जो पनि उनी आफूलाई जोड्न चाहन्थे र यो सबै निकै मुस्किलले भरिएको थियो ।’
अर्बिलेसका अनुसार मानिसहरु पोर्चुगलका स्ट्राइकर रोनाल्डोलाई रुचाउन् वा अर्जेन्टिनाका फरवर्ड मेस्सीलाई मन पराउन् तर उनीहरु म्याराडोनाले पाएको सफलता सपनामा पनि पाउन सक्दैनन् । म्याराडोनाको चमत्कार सदावहार छ ।
अहिले म्याराडोनाको शवको पोस्टमार्टम हुन बाँकी छ । स्थानीय समयानुसार म्याराडोनाको निधन बुधबार दिउँसो ब्युनसआयर्सको टाइगर सहरस्थित उनको घरमा भएको हो ।
म्याराडोनाको यो महिनाको सुरुमा मस्तिष्कबाट जमेको रगत निकाल्ने सफल शल्यक्रिया भएको थियो । रक्सीको लतबाट मुक्तिका लागि पनि उनको उपचार चलिरहेको थियो ।
