सन्दीप अस्ट्रेलियाको होबर्ट हुरिकेन्समा आबद्ध

नेपाली राष्ट्रिय क्रिकेट टिमका लेगस्पिनर सन्दीप लामिछानेले अस्ट्रेलियाको टी–२० फ्रेञ्चाइज लिग बिग ब्यास लिग (बिबिएल) सिजन २०२०–२१ होबर्ट हुरिकेन्सबाट खेल्ने भएका छन् ।
होबर्टले युवा स्पिनर सन्दीपसँग सम्झौता भएको बिहीबार घोषणा गरेको छ ।
सिजनको बिबिएल डिसेम्बरबाट सुरु हुने भए पनि सन्दीप जनावरीदेखि आबद्ध हुने हुरिकेन्सले जनाएको छ ।
हुरिकेन्सबाट बिबिएल खेल्न पाउँदा आफू उत्साहित भएको सन्दीपले बताएका छन् ।
बिबिएल–१० का लागि होबर्ट हुरिकेन्स परिवारमा जोडिन पाउँदा सम्मानित भएको महसुस भएको छ । मलाई अस्ट्रेलियाबाट सधैं धेरै माया र समर्थन आइरहेको छ । स्तरीय प्रतियोगिता बिबिएल उत्साहजनक छ । ब्लन्डस्टोन एरेनामा खेल्न आतुर छु,’ सन्दीपले भनेका छन् ।
हुरिकेन्सका प्रमुख प्रशिक्षक एडम ग्रिफिथले सन्दीप टिमको बलिङ आक्रमणका लागि एक्स–प्mयाक्टर हुने बताएका छन् ।
सन्दीपसँग सम्झौता गरेसँगै हुरिकेन्सको टिम पूर्ण भएको छ । हुरिकेन्समा जेम्स फल्कनर, म्याथ्यु बेड, टिम डेभिड, पिटर ह्यान्डकम, टिम पिने, डिआर्ची सर्टलगायतका खेलाडी छन् ।
विदेशी खेलाडीको रुपमा इंग्ल्यान्डका डविड मालन, सन्दीप लामिछाने र वेस्ट इन्डिजका किमो पाउल छन् ।
सन्दीपले पछिल्ला दुई सिजन मेलवर्न स्टार्सबाट खेलेका थिए । उनले दुई सिजनमा २० खेल खेल्दा २६ विकेट लिएका थिए । उनको बिग ब्यास लिगमा उत्कृष्ट प्रदर्शन ३ विकेट लिएर ११ रन दिनु हो ।
सिजनको बिग ब्यास लिग आगामी १० डिसेम्बरबाट सुरु हुँदै छ । लिग ६ फेब्रुअरीमा सकिनेछ ।
कोरोना भाइरसले २०२० को क्रिकेट खेल तालिका असर गरेको अवस्थामा सन्दीपले तेस्रो लिग खेल्न लागेका हुन् ।
सन्दीप गत साउनमा क्यारेबियन प्रिमियर लिग खेल्न ट्रिनिडाड एन्ड टोबागोमा गएका थिए । उनी त्यतैबाट असोज पहिलो साता आइपिएल २०२० का लागि युएई पुगेका थिए ।
क्यारेबियन प्रिमियर लिगमा सन्दीपले जमैका तलावाजबाट समूह चरण र सेमिफाइनल गरी सबै ११ खेल खेल्दा १२ विकेट लिन सफल भएका थिए ।
तर, सिजनको आइपिएलमा सन्दीपलाई दिल्ली क्यापिटल्सले कुनै पनि खेलमा मौका दिएन ।