कोरोना हटस्पट बन्दै काठमाडौं उपत्यका

आइतबार नेपालभर १ हजार ५ सय ७३ जनामा कोरोना पुष्टि भएको छ । थपिएका कोरोना संक्रमितमध्ये काठमाडौं उपत्यकाका मात्रै आधाभन्दा बढी छन् ।
काठमाडौं उपत्यकामा थप ८ सय ९ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
उपत्यकामा थपिएकामध्ये काठमाडौं जिल्लाका ६ सय ३३ जना, भक्तपुरका ७२ जना र ललितपुरका १ सय ४ छन् । उनीहरूको विभिन्न प्रयोगशालामा परीक्षण गरिएको थियो ।
हालसम्म देशभर ७३ हजार ३ सय ९४ जनामा कोरोना संक्रमण पुष्टि भएको छ । तीमध्ये ५३ हजार ८ सय ९८ जना निको भइसकेका छन् । पछिल्लो २४ घन्टामा मात्रै ८ सय ८५ जना निको भई घर फर्किएको मन्त्रालयका प्रवक्ता डा. जागेश्वर गौतमले बताए ।
संक्रमणबाट नेपालमा अहिलेसम्म ४ सय ७७ जनाले ज्यान गुमाएका छन्। पछिल्लो २४ घन्टामा यसको संक्रमणबाट १० जनाको मृत्यु भएको मन्त्रालयले जनाएको छ ।

६० वर्ष पुगेका व्यक्तिलाई घरबाहिर निस्कन बन्देज

स्वास्थ्य तथा जनसंख्या मन्त्रालयले काठमाडौं उपत्यकालगायत मोरङ, चितवन र सुर्खेतमा संक्रमणको उच्च जोखिम रहेको भन्दै ती ठाउँमा ६० वर्ष उमेर पुगेका व्यक्तिलाई घरबाहिर ननिस्कन आग्रह गरेको छ ।
मन्त्रालयका प्रवक्ता डा. जागेश्वर गौतमले ती ठाउँमा संक्रमणको जोखिम उच्च रहेको भन्दै ६० वर्ष पुगेका, रक्तचाप, मधुमेहका बिरामी, क्यान्सर र मृगौला रोगीहरूलाई घरबाहिर ननिस्कन आइतबार अनुरोध गरेका हुन् ।
त्यस्ता व्यक्तिहरू घरबाहिर निस्कन परेको अवस्थामा अनिवार्य मास्कको प्रयोग गर्न मन्त्रालयले भनेको छ । साथै, दुई मिटरको दूरी कायम गर्न र कामबाट फर्केपछि साबुनपानीले हात धुन मन्त्रालयको सुझाव छ । पछिल्लो समय उपत्यकालगायत बढी जनघनत्व भएको सहरमा संक्रमण दर बढेको देखिएको छ ।