रुसले नेपाललाई कोरोनाविरुद्धको भ्याक्सिन दिने

काठमाडौं
नेपालका लागि रुसी राजदूत एलेक्सी नोभिकभले कोरोनाभाइरसविरूद्ध आफ्नो देशले बनाएको भ्याक्सिन नेपाललाई दिन पहल गर्ने प्रतिबद्धता जनाएका छन् ।
रुसले गत साता विश्वमै पहिलोपल्ट कोरोनाविरुद्धको खोपको सफल परीक्षण गरेको थियो । राष्ट्रिय सभा अध्यक्ष गणेशप्रसाद तिमिल्सिनासँगको शिष्टाचार भेटमा राजदूत नोभिकभले रुसले विकास गरेको कोरोनाको भ्याक्सिन विश्वभरबाट अर्डर आउन थालिसकेको जानकारी गराउँदै नेपालले चाहे छिट्टै उपलब्ध गराउन पहल गर्ने बताएका हुन् ।
‘रसियाले तयार पारेको भ्याक्सिन नोभेम्बरमा विश्व बजारमा आउनेछ । नेपाललाई प्राथामिकतामा राखेर उपलब्ध गराउन सकिन्छ,’ राजदूत नोभिकभले भने ।
भेटमा दुई देशको कूटनीतिक सम्बन्ध, संसदीय सम्बन्ध, कोरोना प्रभाव, पूर्वाधार विकास, व्यापार र लगानीको साझेदारीलगायतका विषयमा कुराकानी भएको अध्यक्ष तिमिल्सिनाको कार्यालयले जानकारी दिएको छ ।
भेटमा अध्यक्ष तिमिल्सिनाले कोरोना भाइरसले गर्दा विश्व आक्रान्त बनेकामा यसको खोपको सफल परीक्षण आशा जगाएको बताए । उनले भने, ‘विश्वका विभिन्न मुलुकहरू कोरोना भाइरसको भ्याक्सिनको खोजीमा लागिरहेका छन् । हालै रुसमा यसको सफल परीक्षण भएपछि आशा जगाएको छ ।’
अध्यक्ष तिमिल्सिनाले रुसद्वारा सफल परीक्षण भएको भ्याक्सिनले छिट्टै विश्व स्वास्थ्य संगठनबाट मान्यता पाउने विश्वास व्यक्त गरे ।
तिमिल्सिनाले रुसमा रहेका नेपाली समुदायलाई सुरक्षित रहन ध्यान दिएकामा रसियन सरकारलाई धन्यवाद दिएका थिए । उनले रसियाले चिकित्सा, इन्जिनियरिङ, औद्योगिक जस्ता क्षेत्रहरूमा सीपयुक्त जनशक्ति विकासमा पु¥याउँदै आएको सहयोग तथा यी क्षेत्रहरूमा दिँदै आएको छात्रवृत्तिले नेपाली विद्यार्थीहरू लाभान्वित भएको बताए ।