रामचन्द्र पौडेलको टिम घोषणा भोलि, महामन्त्रीको उम्मेदवार शशांक

१८ फागुन, काठमाडौं । नेपाली कांग्रेसका नेता रामचन्द्र पौडलले भोलि बुधबार औपचारिक उम्मेदवारीको घोषणा गर्ने भएका छन् । उनले आफ्नो टीम सार्वजनिक गर्नेछन् ।

पौडेल समूहले अपराहृन ४ बजे पार्टी कार्यालय सानेपामा पत्रकार सम्मेलन राखिएको छ । ‘भोलिसम्म सहमतिको प्रयास गर्ने र नभएपछि टिम घोषणा गर्ने भन्ने भएको छ’ पौडेल निकट मानिउका काभ्रे जिल्ला सभापति मधु आचार्यले भने ।

पौडेलको टीमबाट महामन्त्रीमा शशांक कोइराला उम्मेदवार हुनेछन् भने कोषाध्यक्ष टुंगो लागेको छैन । मधेसी समुदायबाट उम्मेदवार बनाउने तयारी छ । यसमा पूर्व राष्ट्रपति डा. रामवरण यादवका भतिजी किरण यादवको सम्भावना प्रवल रहेको स्रोतले बताएको छ ।

पद्मनारायण चौधरी, फर्मुल्लाह मन्सुरको नाम पनि चर्चामा छ । अर्का दावेदार पूर्व राष्ट्रपति यादवका छोरा चन्द्र मोहन यादव भने महाधिवेशन प्रतिनिधि नै नहुने खतरा बढेको छ । उनको क्षेत्र धनुषा ५ मा अनिश्चितकालका लागि अधिवेशन स्थगित भएको छ ।

पौडेल समूहको उपसभापतिका रुपमा प्रकाशमान सिंहलाई हेरिएको छ । यो मनोनित पद भएकाले अहिले घोषणा हुनेछैन । यस्तै मनोनित महामन्त्रीमा पूर्व अर्थमन्त्री डा. रामशरण महतलाई ल्याउने समझदारी भएको छ । तर, महतले सभापति लड्छु भन्न छाडेका छैनन् ।

सिटौलाको छुट्टै भेला 

पौडेल समूहको कार्यक्रम अघि सभापतिका आकांक्षी कृष्ण सिटौलाले कार्यक्रम राखेका छन् । उनले टिम घोषणा नभनी महाधिवेशन प्रतिनिधिहरुलाई स्वागत गर्ने कार्यक्रम राखेका छन् ।

यहि कार्यक्रमबाट उनले सभापतिमा उम्मेदवारी दिने औपचारिक घोषणा गर्न सक्नेछन् । सिटौलाले महामन्त्रीमा गगन थापालाई अघि सार्नेछन् । कोषध्यक्षसहितको उनको अन्य टिम भने तय भइसकेको छैन । उनी अहिले पनि छलफलमै रहेका छन् ।

अर्की नेत्री सुजाता कोइरालाले पनि बुधबार दिउँसो १ बजे समूहसहित उम्मेदवारी घोषणा गर्ने दाबी गरेकी छन् । आफ्नै निवास मन्डीखाटारमा पत्रकार सम्मेलन गरी निर्वाचनका लागि उम्मेदवारी दिने सबैको नामावली सार्वजनिक गर्ने बताइएको छ ।

पार्टीका वरिष्ठ नेता शेरबहादुर देउवाको समूहले भने भोलि नै उम्मेदवारी घोषणा गर्ने सम्भावना न्यून छ । देउवा समूहले अन्य नेताको उम्मेदवारी घोषणा सकिएपछि मात्रै पर्सी उम्मेदवारी घोषणा गर्ने रणनीति बनाएको छ ।

भोलि अन्य केही नेताले पनि पदाधिकारी र केन्द्रीय सदस्यका लागि उम्मेदवारी घोषणा गर्ने तयारी गरेका छन् । केन्द्रीय सदस्यका लागि यसअघि पनि धेरैले उम्मेदवारी घोषणा गरिसकेका छन् ।