बुधबारदेखि सुरु हुँदै महिला साफ च्याम्पियनसिप, नेपाल र भुटानबीच पहिलो भिडन्त
घरेलु मैदानमा साफको उपाधि जित्ने लक्ष्यमा रहेको नेपालका लागि मुख्य प्रतिस्पर्धी भारत
काठमाडौं– छैटौं संस्करणको महिला साफ च्याम्पियनसिप बुधबारबाट काठमाडौंको दशरथ रंगशलामा हुँदै छ । बुधबार हुने उद्घाटन खेलमा आयोजक नेपालले भुटानसँग खेल्नेछ ।
नेपाल र भुटानबीच साँझ ५ः३० बजे खेल सुरु हुनेछ । नेपाल र भुटानले सन् २०१४ यता तीन खेल खेलेका छन् । नेपालले तीनै खेलमा भुटानलाई हराएको छ । नेपालले भुटानविरुद्ध तीन खेलमा १९ गोल गर्दा अहिलेसम्म गोल खाएको छैन ।
भुटानी टिम विगत दुई सातादेखि नेपालमा आएर अभ्यास गरिरहेको छ । अभ्यासका दौरान उसले आर्मीसँग मैत्रीपूर्ण खेल खेलेको थियो । खेलमा भुटान पराजित भयो ।
खेलअघि नेपालका प्रशिक्षक कुमार थापाले कुनै पनि टिमलाई कमजोर नआँक्ने बताएका छन् । नेपालको लक्ष्य समूह चरणमा उत्कृष्ट खेल्ने रहेको उनको भनाइ छ ।
घरेलु मैदानमा साफको उपाधि जित्ने लक्ष्यमा रहेको नेपालले मुख्य प्रतिस्पर्धी भारतलाई लिएको छ ।सन् २०१० देखि भएका पाँच संस्करणका साफ महिला च्याम्पियनसिपका सबै उपाधि भारतले जितेको छ ।भारतले साफको उपाधि जित्दा चार पटक नेपाललाई हराएको थियो । सन् २०१६ मा नेपाल सेमिफाइनलमा पराजित भएपछि फाइनलमा बंगलादेश र भारत भिडेका थिए । त्यसमा पनि भारत विजयी भएको थियो ।
साफमा नेपालको उपाधि यात्रामा सधैं बाधक बनेको भारत दक्षिण एसियाली खेलकुद (साग) को महिला फुटबलमा पनि सधैं तगारो बनेर उभिएको छ ।
सन् २०१०, २०१६ र २०१९ को सागका तीनै संस्करणमा नेपाल र भारतबीच स्वर्ण पदकका लागि प्रतिस्पर्धा भएको थियो । तीनै पटक भारतले स्वर्ण जित्दा नेपालले रजत पदकमै चित्त बुझाउनुप¥यो ।
नेपालले यस पटक समूह चरणमा भने तुलनात्मक रूपमा कमजोर प्रतिद्वन्द्वी पाएको छ। समूह ‘ए’ मा नेपालसहित भुटान र श्रीलंका गरी तीन टिम मात्र रहँदा अझ सहज भएको छ ।
अर्को समूहमा बलियो टिम भारतसहित बंगलादेश, पाकिस्तान र माल्दिभ्स छन् । बंगलादेशले पछिल्लो समय महिला फुटबलमा प्रगति गरिरहेको छ भने पाकिस्तान ८ वर्षपछि अन्तर्राष्ट्रिय फुटबलमा फर्कंदा विदेशमा खेलेका दुई खेलाडीसहित नेपाल आएको छ ।
