नवौं राष्ट्रिय खेलकुदमा नेपाली सेना १२ पदकसहित पहिलो स्थानमा
सेनाले दुई स्वर्ण, चार रजत र ६ कास्य गरी १२ पदक प्राप्त गरेको हो।
काठमाडौं– नवौं राष्ट्रिय खेलकुद प्रतियोगिताअन्तर्गतका केही खेल २३ असोजदेखि पोखरामा सञ्चालन भइरहेका छन् । राष्ट्रिय खेलकुद औपचारिक रुपमा २८ असोजदेखि ३ कात्तिकसम्म गण्डकी प्रदेशका आठ जिल्लामा हुँदै छ ।
समय र पूर्वाधार अभावका कारण केही खेल प्रतियोगिता उद्घाटन अगावै सुरु भएका हुन् । पुरुष क्रिकेट प्रतियोगिता यसअघि नै काठमाडांैमा सम्पन्न भइसकेको छ ।पोखरामा नवौंअन्तर्गत अहिले महिला क्रिकेट, फेन्सिङ र महिला तथा पुरुष ह्यान्डबल खेल जारी छन् । हालसम्म सात स्वर्णसहित २७ पदकको छिनोफानो भएको छ ।
फेन्सिङमा ६ स्वर्णसहित २४ पदकको टुंगो लागेको छ । नेपाली सेना हालसम्म पदक तालिकामा शीर्ष स्थानमा रहन सफल भएको छ ।
सेनाले दुई स्वर्ण, चार रजत र ६ कास्य गरी १२ पदक प्राप्त गरेको छ । लुम्बिनी प्रदेशमा तीन वर्षअघि सम्पन्न आठौँ राष्ट्रियमा विभागीय टोली
नेपाली सेनाको त्रिभुवन आर्मी क्लब च्याम्पियन बनेको थियो ।आर्मीकी रमाकुमारी सिंह र इन्द्र पौडेलले फेन्सिङमा स्वर्ण प्राप्त गरेका छन् ।
यसैगरी बागमती प्रदेश दुई स्वर्ण र एक कास्यसहित तालिकाको दोस्रो स्थानमा छ । बागमतीका ओमकार सिंह र शिक्षा नापितले फेन्सिङमा स्वर्ण जिते । सशस्त्र प्रहरीको एपिएफ क्लब एक स्वर्ण, दुई रजत र पाँच कास्यसहित तेस्रो स्थानमा छ । एपिएफका राजेन्द्र गजुरेलले फेन्सिङमा स्वर्ण जिते ।
सुदूरपश्चिम प्रदेशका जलेन्द्रबहादुर शाहीले फेन्सिङमा स्वर्ण जितेका छन् । सुदूरपश्चिमले एक स्वर्ण र एक कास्य जितेको छ । नेपाल प्रहरीको पुलिस क्लबले पुरुष क्रिकेटमा स्वर्ण जितेको छ ।
आयोजक गण्डकी प्रदेशले हालसम्म एक कास्य पदक प्राप्त गरेको छ । कर्णाली, लुम्बिनी, मधेस, प्रदेश १ र एनआरएन हालसम्म पदकविहीन अवस्थामा छन् । राष्ट्रिय खेलकुदमा ३ सय ९२ स्वर्ण, तीन सय ९२ रजत र ६ सय कास्य गरी १ हजार ३ सय ८४ पदकका लागि सात प्रदेश, तीन विभागीय टोली र एनआएरएनको टोलीबीच प्रतिस्पर्धा हुँदै छ ।
