तानसेनको टुँडिखेल स्तरोन्नति अन्तिम चरणमा

पाल्पा– तानसेन नगरपालिकाको टुँडिखेल मैदान स्तरोन्नति अन्तिम चरणमा पुगेको छ । नगरपालिका कार्यालय परिसरमा रहेको टुँडिखेल मैदानको हालसम्म ८५ प्रतिशत काम सम्पन्न भएको हो ।नगरपालिकाले आर्थिक वर्ष २०७६÷७७ मा टुँडिखेल मैदान सुधारका लागि जयनेपाल ईश्वरचन्द्र निर्माण सेवा प्रालिले दुई वर्षभित्र काम सक्ने गरी ३ करोड ८२ लाख ९४ हजार बराबरको बोलपत्र आह्वान भएकामा ठेक्का सम्झौता गरी निर्माणको जिम्मेवारी लिएको हो ।

टुँडिखेलको खुला क्षेत्रलाई सुधार गरेर आकर्षक बनाउने योजनाअनुसार काम अन्तिम चरणमा पुगेको तानसेन नगरपालिका प्रमुख सन्तोषलाल श्रेष्ठले बताए । ढिलासुस्ती भइरहेको कामलाई निरन्तर निगरानी तथा खबरदारी गरेसँगै टुँडिखेलमा मर्निङवाक स्थल, फुटबल खेलमैदान र विश्रामस्थल बनिसकेको नगरप्रमुख श्रेष्ठ बताउँछन् ।उनी भन्छन्, ‘दुई वर्ष अगाडि नै सक्नुपर्ने काममा निरन्तर ताकेता गरेपछि अहिले दुबो रोपण कार्य सकिने क्रममा छ । यसले तानसेनको थप सुन्दरता थप्नेछ ।’

विगतमा नेपाली सेनाको सहयोग र पाल्पा उद्योग वाणिज्य संघको समन्वयमा टुँडिखेलमा घाँस रोपिएको थियो । अहिले यहाँ ७४ मिटर चौडाइ र १०९ मिटर लम्बाइमा बर्मुडा दुबो रोपिएको छ ।मैदानभित्र रोपिएको दुबो दुई महिनामा हरियो हुन्छ । त्यसलाई दुईपटक घाँस काटेपछि दुबो रोपेको कम्पनी तिलोत्तमा एग्रिकल्चर फार्मले निर्माण व्यवसायीलाई हस्तान्तरण गर्नेछ । कम्तीमा आठ पटक दुबोलाई मेसिनले काटेपछि टुँडिखेलमा खेल खेल्न तयार हुने बताइएको छ ।

आगामी फागुनदेखि खेलमैदान स्तरोन्नति भई पूर्ण रूपमा तयार हुने तानसेन नगरपालिकाका प्रवक्ता यादवसिंह कार्की बताउँछन् । २०५० अघि यहाँ हुने गरेका राष्ट्रिय स्तरका फुटबल प्रतियोगिता वीरेन्द्र सिल्ड, राष्ट्रिय स्तरको भलिबल, इन्डो–नेपाल क्रिकेट, कराँते प्रतियोगितालगायत पुनः सञ्चालन गरिनेछ ।
यहाँको टुँडिखेल मैदान स्तरोन्नति कार्यले खेलप्रेमीमा उत्साह जागेको छ ।पाल्पा सदरमुकाम तानसेन भित्रने नाकामै रहेको मैदानमा ठूला–ठूला कार्यक्रम, सभा, समारोह हुने गरेका छन् । खेलमैदानको छेउमा रहेको पाल्पाली करुवाका कारण पनि यहाँ जानेको आकर्षण उत्तिकै छ । यहाँ रहेको करुवा अवलोकन गर्दै टुँडिखेल विश्राम गरेर बस्ने थलोका रूपमा पनि लिइन्छ ।