पाल्पामा ट्वान्टी ट्वान्टी युवा समूहको लोभलाग्दो कृषि कर्म

कोरोना महामारीका कारण विदेशको रोजगारी गुमाएर स्वेदश फर्किएका रामपुर नगरपालिकाका वडा– ६ का २० जना युवाले सुरु गरे सामूहिक कृषि

पाल्पा–कोरोनाका कारण विश्वमा नै हरेक पेसा तथा व्यवसाय प्रभावित भएको अवस्थामा रामपुरका युवाले भने वैदेशिक रोजगारीको विकल्पमा व्यावसायिक आलु खेती रोजेका छन् । रामपुर नगरपालिका–६ स्थित विजयपुरमा ट्वान्टी ट्वान्टी नामक समूह स्थापना गरी २० जना युवा सामूहिक आलु खेतीमा लागेका हुन् ।
वैदेशिक रोजगारमा रहँदा कोरोनाको महामारी खेपेका युवा गाउँ फर्केपछि चुनौतीलाई अवसरमा बदल्दै आयआर्जनका लागि आलु खेती गरेका हुन् ।
यहाँका युवाले करीब एक सय रोपनी क्षेत्रफलको जग्गा भाडामा लिएर आलु खेती सुरु गरको हुन् । ट्वान्टी ट्वान्टी समूहमा वैदेशिक रोजगारबाट गाउँ फर्केका, विभिन्न पेसा व्यवसायमा आबद्ध युवा मात्र आबद्ध छन् । आलु खेतीमा प्रोत्साहन गर्दै वडा कार्यालयले दस बोरा तथा कृषि ज्ञान केन्द्र पाल्पाले एक सय बोरा जनकदेव र कार्डिनल जातको ५० प्रतिशत बीउ अनुदान उपलब्ध गराएको छ ।
अहिले युवाले सुरु गरेको आलु खेती उदाहरणीय पनि बनेको छ । एकै ठाउँमा ठूलो क्षेत्रफलमा आलु फलेपछि हेर्न आउने र तस्बिर लिनेहरू पनि बढेका छन् ।
कोभिड–१९ को बन्दाबन्दीको समयमा जापानबाट गाउँ फर्किएका युवा बद्री लम्सालले रामपुरको पहिचान बढाउन र आयस्रोत वृद्धिका लागि युवाहरू मिलेर सामूहिक खेती गरेको बताउँछन् । ‘कोभिडले पनि हामी युवामा एउटा ऊर्जा थपिदिएको छ, कोभिडको संक्रमण नभएको भए विदेशमैै भइन्थ्यो होला । अब गाउँमै बसेर काम र दामका लागि सामूहिक कार्य सुरु गरेका छौँ । हामीले सोचेजस्तो गरी खेती पनि भएको छ’, उनले भने ।
विदेशमा दैनिक आठदेखि दस घन्टाको समय काम गर्न बाध्य युवा अहिले घरपरिवारका साथमा रहेर स्वतन्त्र रूपमा काम गर्न पाउँदा उत्साहका साथ कृषि कार्यमा जुटेका छन् ।
कोभिड–१९ ले विश्वव्यापी रूपमा स्वास्थ्यमा नराम्रो असर पारे पनि आफूहरूजस्ता गाउँका युवालाई भने नयाँ कृषि कार्य गर्ने अवसर सिर्जना भएको कोरियाको रोजगारबाट फर्किएका युवा सन्तोष देवकोटाले बताए । सबै क्षेत्रमा आबद्ध रहेका यहाँका युवाले सुरु गरेको सामूहिक आलु खेती नमूना बनेको छ ।
ब्लक क्षेत्रअन्तर्गत यहाँका विभिन्न महिला समूह, आमा समूह, कृषि समूहले पनि समूहमै आलु खेती गरेका छन् ।

सामूहिक कार्यले एक अर्काबीच अनुभव साटासाट गर्ने, नयाँ कुरा सिक्ने अवसर मिलेको आत्मनिर्भर महिला कृषक समूहका उमा भट्टराईको अनुभव छ । विजयपुर कृषि सहकारीले खेती लगाउने समयमा नै मल बिउबिजन उपलब्ध गराएकाले पनि कृषि कार्यमा कृषकलाई सजिलो परेको छ ।

एक सय रोपनी क्षेत्रफलमा करिब ६ सय मेट्रिक टन आलु उत्पादन हुने वडा सदस्य तथा ट्वान्टी ट्वान्टी समूहका आलु लगाउने कार्यक्रम संयोजक यमबहादुर भुजेल बताउँछन् । युवाले आलु खेतीका लागि बिउ अनुदानबाहेक करिब ६ लाख बराबरको लगानी गरेका छन् ।
एकै वडाभित्र करीब एक हजार दुई सय रोपनीभन्दा बढी क्षेत्रफलमा व्यावसायिक आलु खेती गरिएको छ । रामपुर नगरपालिका–६ र कृषि ज्ञान केन्द्र पाल्पाको सहयोगमा एकै ठाउँमा लगाइएको आलु फस्टाउन थालेको छ ।

नगरपालिकाको एक वडा एक उत्पादन कार्यक्रमअन्तर्गत वडा–६ ले विगतका वर्षदेखि आलु खेतीलाई जोड दिएर बिउमा अनुदान उपलब्ध गराउँदै आएको वडाध्यक्ष हुमनाथ न्यौपानेले बताए ।
रामपुर नगरपालिकाले पाँच लाख बजेटमा कृषि शाखामार्फत नगरका कृषकलाई पाँच टन आलु ५० प्रतिशत अनुदानमा वितरण गरेको छ । आलु ब्लक क्षेत्र रहेको वडा–६ मा वडा कार्यालयमार्फत चार लाख रुपैयाँ सहयोगमा पाँच टन आलुको बिउ वितरण गरिएको छ ।
गत वर्ष रामपुर नगरपालिकाभित्र करिब तीन हजार रोपनी क्षेत्रफलमा आलु खेती गरिएको थियो भने यस वर्ष करिब पाँच हजार रोपनीमा आलु लगाइएको छ । ब्लक क्षेत्र रहेकाले पनि यस वर्ष क्षेत्रफल थप गरी कृषकले आलु खेती गरेका छन् ।
यो वर्ष नगरपालिकाभित्र करिब दुई हजार पाँच सय मेट्रिक टन आलु उत्पादन हुने अनुमान रहेको रामपुर नगरपालिकाका कृषि शाखाप्रमुख रामहरि पाण्डेयले जानकारी दिए । रामपुर नगरपालिकाले एक वडा एक उत्पादन नीतिअन्तर्गत वडा–६ लाई आलु पकेट क्षेत्रका रूपमा विकास गरिरहेको छ ।
रामपुर नगरपालिकामा तीन सय मेट्रिक टन क्षमताको शीतभण्डार निर्माण भएकाले पनि भण्डारण गर्न अन्यत्र लैजानुपर्ने बाध्यता हट्ने हुँदा आलु उत्पादनमा जोड दिएको कृषक यमकान्ति गौतम बताउँछन् । रासस