सिके राउतको निर्णय क्षमता प्रचण्डको जस्तै रहेछ : प्रधानमन्त्री ओली
प्रधानमन्त्री केपी शर्मा ओलीले स्वतन्त्र तराई अभियान छोडेर शान्तिपूर्ण राजनीतिमा आउने भनेका चन्द्रकान्त राउतको निर्णय क्षमता आफ्नै पार्टी नेपाल कम्युनिष्टपार्टीका सहअध्यक्ष पुष्पकमल दाहाल (प्रचण्ड) को जस्तै रहेको बताएका छन्।
विहिबार सरकार र राउतबीच भएको राजनीतिक सहमतिमा हस्ताक्षर गर्ने कार्यक्रममा बोल्दै राउतको प्रशंसा गरेका हुन्।
‘मैले सिके राउतमा असाधारण निर्णय क्षमता देखेँ। यस्तो निर्णय क्षमता मैले पुष्पकमल दाहाल प्रचण्डमा मात्रै देखेको थिएँ,’ उनले भने, ‘उहाँले पनि जनयुद्ध छोडेर शान्तिवार्ता हुँदै निर्वाचनमा आउने निर्णय गर्नुभयो। नेकपा एमाले र माओवादी केन्द्र बीचको एकता गर्ने बेलासम्म आइपुग्दा प्रचण्डमा मैले असाधारण निर्णय क्षमता देखेको थिएँ। राउतमा त्यस्तै देखेँ।’
राउतले स्वतन्त्र तराईको माग छोडेर राष्ट्रिय एकतालाई जोड दिएको भन्दै उनले राउतको प्रशंसा गरेका हुन्।
