नेपालले आज युएईसँग प्रतिस्पर्धा गर्दै

अर्को वर्ष  इङल्याण्ड र वेल्समा हुने आईसीसी एकदिवसीय विश्वकप क्रिकेटको छनोट खेल्न जिम्बाबेमा रहेको नेपाली क्रिकेट टोलीले पहिलो वार्म अप म्याचमा आज युएईसँग प्रतिस्पर्धा गर्दैछ । २ साताको अन्तरमा नेपाल र युएईबीच हुन लागेको यो तेस्रो भेट हो । यसअघि नामिबियामा सम्पन्न डिभिजन टु प्रतियोगीताको समुहचरण र उपाधि भिडन्तमा नेपाल र युएईबीच प्रतिस्पर्धा भएको थियो । समुहचरणमा युएईलाई पराजित गरेको नेपाल, उपाधि भिडन्तमा भने पराजित भएको थियो । अभ्यास खेल जिम्बाबेको कोएकोए स्पोर्टस क्लबको  मैदानमा नेपाली समयानुसार दिउँसो सवा १ बजे सुरु हुनेछ । वार्म अप अन्तर्गत आजै वेष्ट ईण्डिज र अफगानिस्तान, जिम्बाबे र आयरल्याण्ड, हङकङ र नेलरल्याण्ड्स तथा पपुवा न्यूगीनी र स्कटल्याण्डपनि आमने सामने हुनेछन् । युएईपछि दोस्रो वार्म अप म्याचमा नेपालले बिहिबार हङकङसंग प्रतिस्पर्धा गर्नेछ । प्रतियोगिताका औपचारिक खेल भने आइतबारबाट सुरु हुनेछन् । पहिलो दिन नेपालले घरेलु टोलीसँग प्रतिस्पर्धा गर्दै विश्वकप छनोट यात्रा सुरु गर्नेछ ।

आजको कान्तिपुरबाट