कालजयी गायक तथा संगीतकार आचार्यको निधन, प्रतिष्ठान परिसरमा श्रद्धाञ्जली अर्पण

काठमाडौं–वरिष्ठ गायक तथा संगीतकार भक्तराज आचार्यको निधन भएको छ। भजन शिरोमणि उपाधिसमेत पाएका आचार्यको सोमबार ८२ वर्षको उमेरमा उपचारका क्रममा ललितपुरको मेडिसिटी अस्पताल लैजाने क्रममा निधन भएको हो।
उनलाई हिजो अपराह्न ४ बजेतिर अक्सिजन तह कम भएपछि अस्पताल लगिएको थियो। त्यसलगत्तै उनको निधन भएको अस्पतालले जनाएको छ।
स्व. गायकप्रति श्रद्धाञ्जलीका लागि पार्थिव शरीर नेपाल संगीत तथा नाट्य प्रज्ञा–प्रतिष्ठानमा राखिएको छ।
प्रतिष्ठानका कुलपति निशा शर्माले पुष्पहार अर्पण गरी सुरु भएको श्रद्धाञ्जली अर्पण अहिले पनि जारी छ। प्रतिष्ठानमा उनलाई श्रद्धाञ्जली दिन शुभेच्छुक तथा गीत–संगीत क्षेत्रका व्यक्तिको उपस्थिति छ।
प्रतिष्ठानकी सदस्यसचिव कुस्मा महराले बिहान ११ बजेदेखि शुभचिन्तक, गीत–संगीत क्षेत्रका व्यक्तित्व तथा कलाकारबाट श्रद्धाञ्जली अर्पण चलिरहेको बताइन्। स्व. आचार्यलाई संस्कृतिमन्त्री सुदन किरातीलगायत सरकारका उच्च अधिकारीले पनि श्रद्धाञ्जली अर्पण गर्दै छन्।
प्रतिष्ठानकी कुलपति निशा शर्माले गीत–संगीत क्षेत्रको एउटा धरोहर ढलेको र उनको अभाव सधैं खड्किरहने बताइन्।
आचार्यले ‘मुटु जलिरहेछ…’, ‘जति चोट दिन्छौं…’, ‘जहाँ छन् बुद्धका आँखा…’, ‘हजार सपनाहरूको…’, ‘माया मेरी साँझ बिहान…’, ‘हजार आँखा हेर्ने…’लगायत करिब चार सय गीतमा आवाज तथा संगीत दिएका छन्। गायक आचार्यका दुई छोरा सत्यराज र स्वरूपराज पनि गीत–संगीत क्षेत्रमै सक्रिय छन्।
उनको राष्ट्रिय सम्मानका साथ बिदाइको तयारी गरिएको छ। विसं १९९९ मा धनकुटामा जन्मिएका आचार्यको नेपाली सुगम संगीतमा महत्त्वपूर्ण योगदान छ।