पाटनमा श्रीकृष्णाष्टमी पर्वको रौनक
काठमाडौं– श्रीकृष्णाष्टमी अवसरमा ललितपुरको ऐतिहासिक पाटन दरबारस्थित कृष्ण मन्दिर परिसरमा भव्य तयारी गरिएको छ । भाद्र कृष्णाष्टमीका दिन सो मन्दिरमा दर्शनार्थी भक्तजनको घुइँचो लाग्ने गर्छ ।
मंगल टोल सुधार संघका अध्यक्ष किरणमान प्रधानले दर्शनार्थी भक्तजनको सुविधाका लागि तयारी भइरहेको बताए । उनले भने, ‘बिहीबार मध्यरातदेखि नै मेला भर्न भक्तजन कृष्ण मन्दिर आउने भएकाले आवश्यक तयारीमा जुटेका हौं।’ दर्शनार्थीलाई व्यवस्थित रूपमा मन्दिर दर्शन गराइने उनले बताए ।
महिला तथा पुरुष भक्तजनलाई छुट्टाछुट्टै लाइनमा राखिने कृष्ण मन्दिरका मूल पुजारी रुपन शर्मा राजोपाध्यायले जानकारी दिए ।ललितपुरका प्रमुख जिल्ला अधिकारी घनश्याम उपाध्यायले मन्दिर परिसर क्षेत्रमा आवश्यक शान्ति–सुरक्षाको व्यवस्था मिलाइएको बताए । गत वर्ष कोभिड महामारीका कारण सो मन्दिरमा मेला भर्न बन्द गरिएको थियो ।
पाटनमा उक्त मेलासँगै भीमसेन खटजात्रा, मच्छिन्द्रनाथ जात्रा एवं कार्तिक नाचसमेत मञ्चन गर्ने गरिन्छ । सो कृष्णमन्दिर मुलुकमा शिखर शैलीमा ढुंगैढुंगाबाट निर्मित २१ गजुर भएको एक मात्रै धार्मिक तीर्थस्थल हो ।
