नेपालमा कोरोना संक्रमितको नयाँ रेकर्ड, एकै दिन थपिए ५ हजार ८
नेपालमा पछिल्लो २४ घन्टामा ५ हजार ८ जनामा कोरोना संक्रमण पुष्टि भएको छ । देशभरका प्रयोगशालामा १९ हजार ३ सय २० नमुना परीक्षण गर्दा १ हजार ८ सय २३ महिला र ३ हजार १ सय ८५ पुरुषमा संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको ।
यो नेपालमा एकै दिन भेटिएको सबैभन्दा धेरै संक्रमित संख्या हो ।
योसँगै कुल संक्रमितको संख्या १ लाख ५ हजार ६ सय ८४ पुगेको छ । उनीहरूमध्ये ६ सय १४ जनाको मृत्यु भएको छ भने ७४ हजार २ सय ५२ जन संक्रमणमुक्त भएका छन् ।
देशभर ३० हजार ८१८ संक्रिय संक्रमित छन् । १७ हजार १ सय ६४ होम र १३ हजार ६ सय ५४ संस्थागत आइसोलेसनमा छन् । उनीहरूमध्ये ३ सय २१ जनाको आईसीयू र ७७ जनाको भेन्टिलेटरमा उपचार भइरहेको स्वास्थ्य मन्त्रालयले बताएको छ ।
मन्त्रालयका अनुसार काठमाडौं उपत्यकाका २ हजार ६ सय ७२ संक्रमित थपिएका छन् । काठमाडौं जिल्लाका २ हजार १ सय, ललितपुरका ३ सय ६९ र भक्तपुरका २ सय ३ जना छन् ।
मोरङका ३ सय ६९, सुनसरीका ३ सय ९४, रुपन्देहीका २ सय १५, चितवनका १ सय ४७, सुर्खेतका १ सय ३४, दाङका ९३, तनहुँका ५५, मकवानपुरका ५४, कास्कीका ५१, झापा र सिन्धुलीका ४८–४८ जना, बाँकेका ४५, प्युठानका ४२, नुवाकोटका ४०, धादिङका ३८ जनामा संक्रमण देखिएको छ ।
यस्तै, पाल्पाका ३७, पर्सा र नवलपुरका ३६–३६, काभ्रे र कैलालीका ३५–३५, नवलपरासीका ३१, गोरखा २५, सर्लाही १९ तथा सिराहा र कञ्चनपुरका १८–१८ जनामा संक्रमण देखिएको छ ।
रौतहटका १७, बाग्लुङ र सल्यानका १२–१२ जना, धनकुटा, धनुषा, महोत्तरी र रुकुम पश्चिमका ११–११, बारा, दैलेख र बझाङका १०–१०, संखुवासभाका ९, दोलखा, जुम्ला र बैतडीका ८–८, म्याग्दी, स्याङ्जाका ७–७ मा कोरोना पुष्टि भएको स्वास्थ्य मन्त्रालयले जनाएको छ ।
यस्तै, उदपयुर, सप्तरी, सिन्धुपाल्चोक, बर्दिया र अछामका ६–६, ओखलढुंगा, रामेछाप र रोल्पाका ५–५, इलाम, डडेलधुरा र डोटीका ४–४, खोटाङ, भोजपुर, रसुवा, पर्वत र दार्चलाका ३–३, लमजुङ र रुकुमपूर्व २–२ तथा ताप्लेजुङ, तेह्रथुम र कालीकोटका १–१ जनामा पनि कोरोना संक्रमण पुष्टि भएको छ ।
स्वास्थ्य मन्त्रालय भन्यो– अप्ठेरो सुरु भयो
स्वास्थ्य तथा जनसंख्या मन्त्रालयले दिनदिनै कोरोना संक्रमित संख्या बढेपछि अप्ठेरो अवस्था आएको बताएको छ । डिस्चार्ज हुने दरभन्दा संक्रमित हुने बिरामी संख्या बढेको भन्दै यसले अप्ठेरो परिस्थिति निम्त्याउने मन्त्रालयले जनाएको हो ।
‘संक्रमितहरूको संख्या धेरै बढेको छ । अस्पतालहरू, आइसोलेसन सेन्टरहरू झन्डै भरिएका छन् । खचाखच बिरामी बढेका छन्’, शनिबारको नियमित प्रेस ब्रिफिङमा प्रवक्ता डा. जागेश्वर गौतमले भने, ‘यसले हामीलाई धेरै अप्ठेरो परिस्थितिमा पु¥याउँदै छ भन्ने आकलन गर्न सकिन्छ ।’
स्वास्थ्य मापदण्ड पालना गर्दै सुरक्षित रहन मन्त्रालयले सबै नागरिकलाई आग्रह गरेको छ ।
पर्यटनमन्त्री भट्टराई कोरोना संक्रमित
संस्कृति, पर्यटन तथा नागरिक उड्ययनमन्त्री योगेश भट्टराईलाई कोरोना संक्रमण पुष्टि भएको छ । शुक्रबार बेलुकी ज्वरो आएपछि मन्त्री भट्टराईले शनिबार स्वाब दिएका थिए । आफ्नो रिपोर्ट पोजेटिभ आएको मन्त्री भट्टराईले बताएका छन् । ‘हालसम्म हल्का ज्वरोबाहेक अरु समस्या देखिएको छैन,’ उनले भनेका छन् ।
उनले आफ्नो सम्पर्कमा आएकाहरूलाई सतर्क रहन र कुनै समस्या देखिए परीक्षण गराउन आग्रह गरेका छन् ।
