प्रधानमन्त्री प्रचण्डद्वारा उदयपुर सिमेन्ट उद्योग अवलोकन
काठमाडौं–प्रधानमन्त्री पुष्पकमल दाहाल ‘प्रचण्ड’ले उदयपुर सिमेन्ट उद्योगको अवलोकन गरेका छन्।
उद्योग रहेको स्थान उदयपुरको जलजले पुगेर उनले प्लान्टलगायत महत्वपूर्ण संरचनाको अवलोकन गरेका हुन्।
प्रधानमन्त्री दाहाललाई महाप्रबन्धक खगेन्द्र बस्नेतलगायतका उच्च अधिकारीले उद्योगको समग्र अवस्थाबारे जानकारी गराएका थिए।
सो क्रममा प्रधानमन्त्री दाहालले उद्योगलाई यही अवस्थामा नभई ‘अपग्रेड’ गरेर सञ्चालन गर्नुपर्ने बताए। उद्योगको समस्यालाई गम्भीर रुपमा लिएको उल्लेख गर्दै उनले दीर्घकालीन रुपमा सञ्चालन गर्न सरकार तयार रहेको जानकारी दिए।
अहिले उद्योग पूर्ण क्षमतामा सञ्चालन हुन सकेको छैन।
उदयपुर सिमेन्ट सरकारी स्वामित्वको कम्पनी हो। नेपाल र जापान सरकारको संयुक्त लगानीमा २०४४ जेठ ३१ मा उद्योग स्थापना भएको थियो। उक्त उद्योगले उत्पादन गरेको ‘गैंडा छाप’ ब्रान्डको सिमेन्ट नेपाली उपभोक्तामाझ लोकप्रिय छ।
