गभर्नर अधिकारीविरुद्धको रिट न्यायाधीश सुष्मलता माथेमाको इजलासमा

काठमाडौं- राष्ट्र बैंकका गभर्नर महाप्रसाद अधिकारीको शैक्षिक योग्यताको विषयलाई लिएर बिहीबार सर्वोच्च अदालतमा दायर रिटको सुनुवाइका लागि न्यायाधीश सुष्मालता माथेमाको इजलासमा पेसी तोकिएको छ।
अधिवक्ताहरू दामोदर तिम्सिना, चूडामणि भण्डारी, दीपकराज जोशी र प्रतापसिंह ठकुराठीले गभर्नर अधिकारीको शैक्षिक योग्यता स्नातक मात्रै रहेको दाबीसहित उनको नियुक्ति बदर माग राख्दै सर्वोच्चमा बिहीबार रिट दर्ता गराएका थिए।
गभर्नर अधिकारीविरुद्धको रिटमाथि प्रारम्भिक सुनुवाइ हुन लागेको हो।
रिट निवेदनमा गभर्नर अधिकारीको शैक्षिक योग्यता चार्टड एकाउन्टेन्ट मात्रै रहेको र चार्टड एकाउन्टेन्ट स्नातकोत्तर तह नभई स्नातक तह मात्रै रहेको दाबीसहित गभर्नर पदका लागि उनी योग्य नरहेको जिकिर गरिएको छ।
राष्ट्र बैंक ऐन, २०५८ को दफा २० मा गभर्नरका लागि न्यूनतम शैक्षिक योग्यता स्नातकोत्तर हुनुपर्ने व्यवस्था छ।
सरकारले २०७६ चैत २४ मा अधिकारीलाई राष्ट्र बैंकको गभर्नर पदमा नियुक्त गरेको थियो।