२५ जोडी वरवधुको निःशुल्क विवाह

काठमाडौं– विश्व हिन्दु परिषद्ले धनुषाको जनकपुरधाममा २५ जोडी वरवधुको निःशुल्क विवाह गराएको छ ।
परिषद् अध्यक्ष सन्तोष साहको सक्रियतामा जनकपुरधामको जानकी मन्दिरमा शुभविवाह कार्यक्रम आयोजना गरिएको हो ।
भगवान् श्रीराम तथा माता सीताको शुभविवाहको अवसर पारेर जनकपुरधाममा सामूहिक निःशुल्क विवाह आयोजना गरिएको परिषद्का केन्द्रीय सदस्य डा मनोहर साहले बताए ।
सामूहिक शुभ विवाहका लागि लगन आवश्यक नभएको कारणले सामूहिक शुभ विवाह आयोजना गरिएको परिषद्का केन्द्रीय सदस्य साह बताउँछन् ।
विवाहमा बेहुला तथा बेहुलीका लागि आवश्यक पर्ने कपडा, एक थान पोतेसहितका आवश्यक पर्ने सबै सामग्री परिषद्ले निःशुल्क उपलब्ध गराएको थियो । विवाहलाई कम खर्चिलो तथा ऐतिहासिक बनाउन गरिब तथा विपन्न वर्गका बेहुलाबेहुलीको छनोट गरिएको केन्द्रीय सदस्य साहले जानकारी दिए ।
विवाहमा आउने जन्ती तथा परिवारलाई भोजन तथा आवासको व्यवस्थापन कलवार धर्मशालामा परिषद्ले नै गरेको थियो । विगत पाँच वर्षदेखि विश्व हिन्दु परिषद्ले सामूहिक विवाहको आयोजना गर्दै आएको छ ।
यसले विवाहमा हुने भड्किलो खर्चमा कमी आउनाका साथै अर्थका कारणले विवाह हुन नसकेकालाई राहत मिल्ने गरेको विवाहमा आएका बेहुली पक्षका आफन्तले बताएका छन् ।
विश्व हिन्दु परिषद् नेपालले चार वर्षदेखि जनकपुरधाममा विवाह पञ्चमीको भोलिपल्ट सामूहिक विवाह कार्यक्रम गर्दै आएको छ । विवाहका नाममा लिने दाइजो (दहेज) प्रथालाई चुनौती दिँदै ती जोडीको आदर्श विवाह गरिएको हो ।
प्रत्येक जोडीका लागि छुटाछुट्टै मण्डप अर्थात् मडबा वेदी बनाइएको जिल्ला अध्यक्ष सन्तोष साहले बताए । सामूहिक विवाहका लागि जनकपुरका सहयोगी हातहरुले सहयोग गरेका थिए ।
आयोजकले विवाहपूर्व झाँकी पनि निकालेर नगर परिक्रमा गराएका थिए ।
जनकपुरधाम रामसीताको विवाहस्थल भएकाले वैवाहिक संस्कार विकास गर्न र देश विदेशबाट यहाँ व्यक्ति विवाहका लागि आउने वातावरण तयार गर्न नै परिषद्ले सनातन परम्पराको सामूहिक विकास हेतु सामूहिक विवाहको कार्यक्रम आयोजना गरेको केन्द्रीय सदस्य डा मनोहर साहले बताए ।
कलवार कुट्टीमा वरवधु पक्षलाई भोजनपछि नगर परिक्रमा गराइएको थियो । विश्व हिन्दू परिषद् नेपालले गरेको सामूहिक विवाहको आह्वानमा तराई मधेसका विभिन्न जिल्लाका बेहुलाबेहुलीले विवाहका लागि फारम भरेका थिए ।
कानुनअनुसार बेहुलाबेहुलीको विवाह गर्ने उमेर पुगेको हुनुपर्ने सर्त राखिएकाले २० वर्षमाथिका बेहुलाबेहुलीको अभिभावकले फाराम भरेका थिए । आवेदन फाराममा वर र वधुको उमेर खुल्ने नागरिकता वा जन्मदर्ता संलग्न गरिएको विश्व हिन्दु परिषद्ले जनाएको छ ।