काठमाडौं महानगरसँग भगिनी साइनो गाँसेका २५ नगरलाई इन्द्रजात्रा अवलोकनको निम्तो

काठमाडौं– काठमाडौं महानगरले इन्द्रजात्रा अवलोकनका लागि विश्वका २५ नगरलाई निमन्त्रणा पठाएको छ । ८ साउनमा बसेको छैटौं कार्यपालिका बैठकको निर्णयअनुसार जात्रा हेर्न भगिनी सम्बन्ध भएका १८ वटा नगर र दक्षिण एसियाली मुलुकबाट ७ वटा राजधानी सहरका प्रमुख गरी २५ नगरबाट प्रमुखलाई निमन्त्रणा गरिएको महानगरका सहायक प्रवक्ता महेश काफ्लेले बताए ।

यस वर्षको इन्द्रजात्रा २४ भदौमा परेको छ । काफ्लेका अनुसार जात्रामा प्रमुखका साथमा चार अधिकारीसमेत निम्तो दिइएको छ। २५ नगरबाट चार जना सहभागी आउँदा १०० पाहुना आउनेछन् । तर निम्तो पठाइएका प्रतिनिधि आउने÷नआउने अहिलेसम्म टुंगो लागेको छैन ।
‘कोभिड महामारी अझै सकिएको छैन । कुन–कुन पाहुना आउने÷नआउने टुंगो छैन । निम्तो गरेका छौं । पाहुनालाई खाने, बस्ने र घुमाउने व्यवस्था महानगरले गर्नेछ,’ प्रवक्ता काफ्लेले भने।

२०७६ को इन्द्रजात्रामा ६ देशका १३ वटा नगरलाई निम्तो गरिएको थियो । तीमध्ये ५ देशका ११ नगरबाट चार जना मेयर, उपमेयर÷उपाध्यक्षसहित ४१ पाहुनाले इन्द्रजात्रामा सहभागिता जनाएका थिए । हाल देशभित्रका पाँच र अन्तर्राष्ट्रिय स्तरका १८ नगरसँग महानगरको भगिनी सम्बन्ध छ ।