आकस्मिक र कोरोनाबाहेकका सेवा वहिष्कार गर्ने चिकित्सक संघको निर्णय

नेपाल चिकित्सक संघले आइतबार देशभरका स्वास्थ्य संस्था तथा अस्पतालमा आकस्मिक र कोरोनाबाहेकका सबै सेवा वहिष्कार गर्ने घोषणा गरेको छ ।
२७ दिनदेखि आमरण अनशनरत डा. गोविन्द केसीको जीवन रक्षाका निम्ति सरकार गम्भीर नभएको र वार्तालाई सीमित गराएको भन्दै संघले आइतबार आकस्मिक र कोभिड–१९ बाहेकका सम्पूर्ण सेवा वहिष्कार गर्ने निर्णय गरेको हो ।
२५ असोजसम्म सत्याग्रह अन्त्य नभए कडा आन्दोलनका कार्यक्रम गर्ने चिकित्सक संघको चेतावनी छ ।
डा. केसीले ६ बुँदे माग राखेर २९ भदौमा अनशन थालेका थिए । अनशनको २४औं दिन सरकारले वार्ता टोली बनाएपछि बिहीबार र शुक्रबार वार्ता पनि भएको थियो ।
डा. केसीको तर्फबाट बनेको वार्ता टोलीमा चिकित्सक संघका अध्यक्षसमेत सदस्य छन् । तर, सहमति जुट्न सकेको छैन ।
शनिबार मात्र सरकारी वार्ता टोलीले कोभिड–१९ महामारीले मुलुक आक्रान्त बनेको विषम परिस्थितिमा अनशन अन्त्य गर्न डा. केसीलाई आग्रह गरेको छ ।

शिक्षामन्त्रीकै कारण वार्तामा अवरोध
डा. केसी र सरकारी वार्ता टोलीबीचको सहमतिलाई शिक्षामन्त्री गिरिराजमणि पोखरेलले अस्वीकार गरेपछि सरकार र डा. गोविन्द केसीबीच हुनै लागेको सहमति भाँडिएको छ ।
६ बुँदे माग राखेर २६ दिनदेखि अनशनरत डा. केसी पक्ष र सरकारी टोली लगभग सहमतिमा पुगेको थियो । सहमतिको मस्यौदा सरकारी वार्ता टोलीका संयोजक एवं शिक्षा सचिव गोपी मैनालीले प्रधानमन्त्री केपी ओलीसम्म पु¥याएका थिए ।
स्रोतका अनुसार सरकारी पक्षबाट त्रिवि चिकित्साशास्त्र अध्ययन संस्थान (आईओएम) पदाधिकारीलगायतको नियुक्तिको मापदण्ड ऐनमा समावेश नहुँदासम्म हुने नियुक्तिबारे सहमतिको मस्यौदाको भाषामा थोरै हेरफेर गरेको थियो । अरु सबै विषयमा वार्ता टोलीबीच भएको सहमति नै सदर भएको थियो ।
त्यही परिमार्जित विषयमा दुई वार्ता टोली बसेर टुंगो लगाउने र डा. केसीको अनसन शुक्रबार नै तोडाउने तयारी थियो । त्यही सन्देश पाएको डा. केसीको वार्ता टोली दिनभर तयारी अवस्थामा थियो ।
सरकारी टोली वार्तामा आएन । स्रोतका अनुसार सरकारी वार्ता टोलीका संयोजक मैनालीले लाइन मिनिस्टरलाई देखाएर मात्र सहमतिलाई आौपचारिकता दिन चाहे । तर, मन्त्रीले साँझ ७ बजे मात्र समय दिए । त्यसपछि पनि मन्त्री पोखरेलले दुई वार्ता टोलीले बनाएको मस्यौदामा थप संशोधन गरे ।
उनले चिकित्सा शिक्षा ऐन संशोधनसम्बन्धी सहमतिमा डा. केसीसँग सहमति भएको मिति हटाइदिए । साथै, अहिले गर्न लागिएको सहमतिलाई मन्त्रिपरिषद् बैठकमा लैजाने भन्ने बुँदा पनि हटाउन लगाए । त्यही कारण हुनै लागेको सहमति भाँडिएको हो ।
डा. केसीको तर्फबाट बनेको वार्ता टोलीका संयोजक डा. जीवन क्षेत्रीले पनि वार्ता टोली स्तरमा भएको सहमतिबाट सरकार पछि हटेको बताए ।