बालुवाटार पस्यो कोरोना

प्रधानमन्त्री केपी ओली सचिवालयका चार सदस्यलाई कोरोना भाइरस संक्रमण पुष्टि भएको छ ।
राजनीतिक सल्लाहकार विष्णु रिमाल, विदेश मामिला सल्लाहकार राजन भट्टराई, प्रेस सल्लाहकार सूर्य थापा र प्रमुख स्वकीय सचिव इन्द्र भण्डारीलाई पनि संक्रमण देखिएको छ ।
उनीहरूको शुक्रबार स्वाब गरिएको थियो । ‘चालकदेखि सबैको स्वाब संकलन गरिएको थियो । सचिवालयका हामी चार जनाको पोजेटिभ आएको छ,’ थापाले भने, ‘केही चालकमा पनि संक्रमण देखिएको छ ।’
बालुवाटारमै कोरोना पसेपछि प्रधानमन्त्री ओलीको स्वाब परीक्षण गरिएकामा उनको नेगेटिभ रिपोर्ट आएको छ ।
६७ सुरक्षाकर्मीलाई कोरोना संक्रमण
प्रधानमन्त्री निवास बालुवाटारमा खटिएका ६७ सुरक्षाकर्मीलाई कोरोना संक्रमण पुष्टि भएको छ । नेपाली सेनाका २८, नेपाल प्रहरीका १९, सशस्त्र प्रहरीका १८ जना र राष्ट्रिय अनुसन्धान विभागका २ जनालाई कोरोना संक्रमण देखिएको छ ।
अहिलेसम्म प्रधानमन्त्रीको सुरक्षाका लागि पहिलो घेरामा खटिने सुरक्षाकर्मीमा भने संक्रमण देखिएको छैन ।

उपत्यका कोरोना हटस्पट
नेपालमा पछिल्लो २४ घन्टामा २ हजार १ सय २० थप जनामा कोरोना संक्रमण पुष्टि भएको छ ।
देशभरका प्रयोगशालामा १२ हजार ९ सय ७८ नमुना परीक्षण गर्दा ७ सय ६६ महिला र १ हजार ३ सय ५४ पुरुषमा संक्रमण पुष्टि भएको हो ।
योसँगै कुल संक्रमितको संख्या ८४ हजार ५ सय ७० पुगेको छ । उनीहरूमध्ये ५ सय २८ जनाको मृत्यु भएको छ भने ६२ हजार ७ सय ४० जना संक्रमणमुक्त भएको स्वास्थ्य तथा जनसंख्या मन्त्रालयको नियमित प्रेस ब्रिफिङमा जानकारी दिइएको छ ।
२ हजार ४४ जना पछिल्लो २४ घन्टामा मात्र कोरोना संक्रमणमुक्त भएका छन् । देशभर २१ हजार ३०२ संक्रिय संक्रमित छन् । ११ हजार ५२९ जना होम र ९ हजार ७ सय ७३ जना संस्थागत आइसोलेसनमा छन् । उनीहरूमध्ये २ सय १७ जनाको आईसीयू र ३१ जनाको भेन्टिलेटरमा उपचार भइरहेको छ ।
मन्त्रालयका अनुसार शनिबार थपिएका संक्रमितमध्ये १ हजार १ सय ७७ जना उपत्यकाका छन् । काठमाडौंका १ हजार १, भक्तपुरका ६७ र ललितपुरका १ सय ९ जनामा संक्रमण पुष्टि भएको हो ।
यस्तै, सुनसरीका १ सय २२ जना, मोरङका १ सय ११, रुपन्देहीका ९८, कैलालीका ९३, रौतहटका ८२, चितवनका ७५, सुर्खेतका ४३, बाराका २५, कास्कीका २२, सप्तरी र बाँकेका १९–१९ जना, पर्साका १८, काभ्रेका १४, धनुषाका १३, मकवानपुरका १२ तथा तनहुँ र बर्दियाका १०–१० जनामा संक्रमण पुष्टि भएको छ ।
झापा र दैलेखका ९–९ जना, सिराहा, धादिङ, नुवाकोट र नवलपुरका ८–८ जना, उदयपुर र पाल्पाका ७–७, रामेछाप, गोरखा, कपिलवस्तु, नवलपरासी र प्युठानका ६–६ जना, खोटाङ, महोत्तरी, सर्लाही र कञ्चनपुरका ५–५ जना, ओखलढुंगा र दोलखाका ४–४ जना, संखुवासभा र लमजुङका ३–३ जना, स्याङ्जा, अर्घाखाँची, गुल्मी र डडेलधुराका २–२ जना तथा पर्वत, म्याग्दी, बाग्लुङ, रोल्पा, कालीकोट, दार्चुला, बझाङ र बाजुराका १–१ जनामा संक्रमण देखिएको स्वास्थ्य मन्त्रालयले बताएको छ ।