अमेरिकाको टेक्ससमा अन्धाधुन्ध गोली प्रहार, २६ को मृत्यु

बीबीसी। अमेरिकाको टेक्सस प्रान्तमा आइतबार चर्चमा अन्धाधुन्ध गोली प्रहार हुँदा २६ जनाको मृत्यु भएको छ। एक बन्धुकदारीले चर्चमा प्रार्थना भइरहेका बेला अन्धाधुन्ध गोली प्रहार गरेको बीबीसीले जनाएको छ। प्रहरीका अनुसार सो गोलीबारीमा २६ जनाको मृत्यु भएको छ भने कयौं घाइते भएका छन्।

सो आक्रमण सदरल्याण्ड स्प्रिंग्सको विलसन काउन्टी इलाकाको फस्र्ट बाप्टिस्ट चर्चमा भएको हो। बीबीसीका अनुसार आक्रमणकारी स्थानीय समय अनुसार विहान ११ः३० बजे चर्चमा प्रवेश गरेर अन्धाधुन्ध गोली प्रहार गरेका थिए। प्रहरीको कारवाहीमा आक्रमणकारीको पनि मृत्यु भएको छ।

सामाजिक संजालमा पोष्ट गरिएको भिडियोमा चर्चको बाहिरी भागलाई प्रहरीले घेरा हालेको देखिएको छ। घाइतेलाई अस्पताल पुर्याउन हेलिकप्टरको प्रयोग गरिएको छ।

एफबीआइका प्रतिनिधि घटनास्थलमा पुगेका छन्। टेक्ससका गभर्नर ग्रेगले सो आक्रमणलाई घृणित कामको संज्ञा दिँदै भनेका छन्, ‘यो एकदमै घृणित कार्य हो,यसले सबैलाई नोक्सान भएको छ।’ उनले टेक्ससको इतिहासमा यो सबैभन्दा भयावह गोलीबारी भएको बताए।

टेक्ससका जनसुरक्षा विभागका क्षेत्रीय निर्देशक फ्रिम्यान मार्टिनले सो गोलीबारीमा मृत्यु हुनेको उमेर पाँच वर्षदेखि ७२ वर्षकासम्म रहको बताए। प्रशासनले कम्तिमा पनि २० जना घाइते भएको जनाएको छ। जापानको भ्रमणमा रहेका राष्ट्रपति डोनाल्ड ट्रम्पले ट्विट गर्दै भनेका छन, ‘भगवान सदरल्याण्ड स्प्रिंग्स, टेक्ससका मानिसलाई साथ दिनुहोस्। एफबीआई र प्रहरी समयमै घटनास्थल पुगेका छन्। म जापानबाट घटनामाथि नजर राखिएको छु।’

source ; dcnepal