महिला हिंसा विरुद्ध राज्य सशक्त भएर उभिन्छ
पोखरा, १४ माघ । महिला, बालबालिका तथा समाजकल्याण मन्त्री कुमार खड्काले मुलुकको समग्र विकासका लागि महिला सशक्तिकरणमा विशेष जोड दिनुपर्ने बताउनुभएको छ ।
पोखरा– १६ बाटुलेचौरस्थित हिमालय क्लबद्वारा उहाँको सम्मानमा आज यहाँ आयोजित समारोहमा मन्त्री खड्काले महिला सशक्तिकरण कार्यलाई राज्यले विशेष प्राथमिकतामा राखेको छ भन्नुभयो ।
उहाँले कुनै पनि प्रकारका महिला हिंसा राज्यलाई स्वीकार हुने छैन्, यसका विरुद्ध राज्य सशक्त भएर उभिन्छ भन्दै हिंसामा परेका महिला, सडक बालबालिका र वृद्धवृद्धाको संरक्षणको दायित्व सरकारले लिने धारणा व्यक्त गर्नुभयो ।
‘स्थानीय तहको निर्वाचन जतिसक्दो छिटो होस् भन्ने चाहना र प्रतिवद्धता सरकारको छ, मन्त्री खड्काले भन्नुभयो – यस सम्बन्धी विधेयक पास गराउन फास्ट ट्र्याकबाट अघि बढेकाले अव निर्वाचन हुँदैन कि भनेर कसैले शङ्का गर्नु हुदैन् ।’
राष्ट्रिय परोपकार महासङ्घका अध्यक्ष पण्डित कमलनयन गौतमले समाज, राष्ट्र र जनताको हितका लागि असल नियतका साथ काम गरेमा त्यस्ता व्यक्तिलाई समाजले सधँै सम्मान गरिरहने बताउनुभयो ।
क्लबका अध्यक्ष जीवनारायण श्रेष्ठको अध्यक्षतामा सम्पन्न सो समारोहमा नेपाली काँग्रेसका जिल्ला अध्यक्ष कृष्ण केसी, राप्रपाका जिल्ला अध्यक्ष जयलाल पुन र अखण्ड नेपाल पार्टीका जिल्ला अध्यक्ष पद्मबहादुर कार्कीलगायतले समाजसेवाका विविध पक्षमाथि प्रकाश पार्नुभयो ।
समारोहमा बाटुलेचौरका ४७ भन्दा बढी सङ्घ संस्थाले मन्त्री खड्कालाई अभिनन्दन गरेका थिए । रासस
