प्रमुख समाचार
Thursday, 20 Jun, 2024
सर्लाही बस दुर्घटनामा ३ को मृत्यु, दर्जनौं घाइते
काठमाडौं–सर्लाहीको बागमती नगरपालिकास्थित रायमाझी चोकमा आज बिहान भएको सवारी दुर्घटनामा ३ जनाको मृत्यु भएको छ भने १७ जना घाइते भएका छन्।
पूर्व–पश्चिम राजमार्गस्थित बागमती नगरपालिका–११ रायमाझी चोकमा रोकिराखेको ट्रकमा यात्रीवाहक बस ठोक्किँदा रुपन्देहीको मायादेवी गाउँपालिकाका हरिबहादुर चौधरी, ८५ वर्षका दशरथ कोहार र ५० वर्षका रामकरण केवटको मृत्यु भएको सर्लाही प्रहरीले जनाएको छ।
घटनालगत्तै उद्धार गरी उनीहरुलाई हरिवनस्थित नमुना अस्पताल पुर्याएकोमा चिकित्सकले मृत घोषणा गरेको इलाका प्रहरी कार्यालयका प्रहरी निरीक्षक अनिलराज गिरीले बताए।
रुपन्देहीबाट जनकपुरतर्फ आइरहेको बस दुर्घटना भएको हो। बसमा ४० यात्रु सवार रहेको प्रहरीले जनाएको छ।
दुर्घटनामा गम्भीर घाइतेको जनकपुर, वीरगञ्ज तथा स्थानीय अस्पतालमा उपचार भइरहेको छ।
