सहकारी दुरुपयोग प्रकरणः संसदीय छानबिन विशेष समितिले बनायो कार्यविधि

काठमाडौं–सहकारीको रकम दुरुपयोग सम्बन्धमा छानबिन गर्न गठित संसदीय छानबिन विशेष समितिले कार्यविधि बनाएको छ। समितिको आइतबार बसेको बैठकले सर्वसम्मत कार्यविधि पारित गरेको समिति सदस्य लेखनाथ दाहालले जानकारी दिए। ‘समितिका सदस्यबीच प्रस्तावित कार्यविधिमा छलफल भई सर्वसम्मत पारित भएको छ। सोही आधारमा अनुसन्धान अघि बढ्नेछ’, उनले भने।
समिति सदस्य शिशिर खनालका अनुसार पहिलो चरणमा सम्बन्धित मन्त्रालय र विभागसँग छलफल गरिनेछ। त्यसका लागि मंगलबारका लागि बैठक बोलाइएको छ।
उक्त बैठकमा भूमि व्यवस्था, सहकारी तथा गरिबी निवारणमन्त्री, सहकारी विकास बोर्ड पदाधिकारीलगायतलाई छलफलका लागि डाकिएको छ। २९ वटा सहकारीको लिखित प्रतिवेदनसहित छलफल हुनेछ। कार्यविधि पारित भएसँगै मंगलबारदेखि नियमित काम सुरु हुनेछ। गत जेठ १५ मा गठन भएको समितिमा एमाले सांसद सूर्य थापा सभापति रहेका छन्।
नेपाली कांग्रेसबाट सह–महामन्त्री बद्रीप्रसाद पाण्डे र केन्द्रीय सदस्य एवं सांसद ईश्वरी न्यौपाने, एमालेकी सरिता भुसाल, माओवादी केन्द्रका लेखनाथ दाहाल, राष्ट्रिय स्वतन्त्र पार्टी ९रास्वपा० का शिशिर खनाल र राष्ट्रिय प्रजातन्त्र पार्टी ९राप्रपा० का ध्रुवबहादुर प्रधान सदस्य रहेका छन्।