पूर्वन्यायाधीशको निधनपछि सर्वोच्चको इजलास बन्द

काठमाडौं–सर्वोच्च अदालतका पूर्वन्यायाधीश हरिजंग सिजापतिको निधन भएपछि आजका लागि तोकिएका सबै पेशी र इजलासबाट हुने सुनुवाइ स्थगन भएको छ। पूर्वन्यायाधीशको निधनका कारण पेशी तोकेर सुनुवाइमा चढिसकेका सबै मुद्दा स्थगित भएको सर्वोच्च प्रशासनले जानकारी दिएको हो। आज गण्डकी र सुदूरपश्चिम प्रदेश सरकारविरुद्धको रिटमाथिको सुनुवाइ हुने तय थियो।
कोसी प्रदेशका मुख्यमन्त्री केदार कार्कीले पनि प्रदेश प्रमुख पर्शुराम खापुङले असंवैधानिक ढंगले नयाँ सरकार गठन गर्न आह्वान गरेको भन्दै सर्वोच्चमा रिट हाल्ने तयारी थियो। सर्वोच्चबाट सुनुवाइ हुने भनिएका र रिट हाल्ने तयारीमा रहेका तीन वटै प्रदेशमा यसअघि कांग्रेस सरकार थियो।
गण्डकीका खगराज अधिकारी, सुदूरपश्चिमका दीर्घ सोडारीविरुद्धको सुनुवाइ र कोसी प्रदेश प्रमुख खापुङविरुद्ध मुख्यमन्त्री केदार कार्की सर्वोच्चमा रिट हाल्ने तयारीमा थिए। तर, पूर्वन्यायाधीशको निधनका कारण सर्वोच्च प्रशासनबाहेक मुद्दा फाँट आज बन्द रहनेछ।