मेरा लागि आगामी चुनाव अन्तिम : झलनाथ
बुटवल– नेकपा (एकीकृत समाजवादी) का नेता एवं पूर्वप्रधानमन्त्री झलनाथ खनालले आगामी ४ मंसिरमा हुने प्रतिनिधिसभा निर्वाचनमा आफू अन्तिम पटकका लागि उम्मेदवारी दिने बताएका छन् । खनालले आफू यसपालि इलामको क्षेत्र १ बाट सत्तारुढ गठबन्धनको उम्मेदवारका रूपमा चुनाव लड्ने बताए ।
आइतबार भैरहवास्थित गौतमबुद्ध अन्तर्राष्ट्रिय विमानस्थलमा पत्रकारसँग कुराकानी गर्दै खनालले आगामी मंसिरमा हुने चुनावमा लड्ने बताएका हुन् ।राष्ट्रपति हुने सहमतिमा चुनाव नलड्ने चर्चाबारे सोधिएको प्रश्नमा खनालले भने, ‘जनतासँगको माया–पिरती टुटेको छैन । २०४८ देखि चुनाव लड्दै आएको छु, अब एक पटक लड्छु ।’
आफूले इलाम क्षेत्र १ बाट चुनाव जित्ने उनको दाबी छ । अहिले पाँच दलीय गठबन्धनबाटै निर्वाचनमा होमिने खनालले बताए ।‘गठबन्धन दृढतापूर्वक अगाडि बढ्छ,’ उनले भने । खनालले गठबन्धन चुनावसम्म मात्र हुन्छ कि पछिसम्म जान्छ भन्ने कुरा भन्न नसकिने सुनाए ।
उनले तत्काल एमालेसँग तालमेल र एकताको सम्भावना नरहेको जानकारी दिए । खनालले आफूहरूलाई एमालेभन्दा नेकपा माओवादी केन्द्रसँग नजिक लागिरहेको बताए ।
‘मुलुकका लागि बृहत् वामपन्थी एकताको आवश्यकता थियो। त्यो भएन तर समाजवादी रुपान्तरणको सिलसिलामा एकताबद्ध हुनैपर्छ,’ उनले भने ।
