नेपालको फिफा वरीयता १७१ औं
नेपालको फुटबल वरीयता यथावत रहेको छ । विश्व फुटबल महासंघ (फिफा) ले सार्वजनिक गरेको वरीयताअनुसार नेपाल १७१ औं स्थानमा यथावत छ ।
नेपालले एक महिनायता कुनै पनि अन्तर्राष्ट्रिय फुटबल प्रतियोगिता खेलेको छैन । बंगलादेशबाहेक दक्षिण एसियाका सबै देशको वरीयता यथावत रहेको फिफाले जनाएको छ ।
बंगलादेश फिफा वरीयतामा दुई स्थान तल झरेको छ । गत साता बंगलादेश विश्वकप छनोटअन्तर्गत कतारसित पराजित भएको थियो । दक्षिण एसियाली देशमध्ये भारत १०४ औं स्थानमा छ भने मालदिभ्स १५५, बंगलादेश १८६, भुटान १८९, पाकिस्तान २०० तथा श्रीलंका २०६ औँ स्थानमा रहेका छन् ।
फुटबलको विश्व वरीयतामा बेल्जियम शीर्ष स्थानमा यथावत छ । फिफा वरीयतामा फ्रान्स दोस्रो, ब्राजिल तेस्रो, बेलायत चौथो, पोर्चुगल पाँचौं, स्पेन छैटौं, अर्जेन्टिना सातौं, उरुग्वे आठौं, मेक्सिको नवौं तथा इटाली १० औं स्थानमा छन् ।
