बालुवाटार निवासमा पार्टी बैठक नगर्ने प्रधानमन्त्रीको उद्घोेष

काठमाडौं– प्रधानमन्त्री एवं नेकपा एमाले अध्यक्ष केपी शर्मा ओलीले प्रधानमन्त्रीको सरकारी निवास बालुवाटारमा पार्टीका कुनै पनि बैठक नगर्ने घोषणा गरेका छन्। सामाजिक सन्जाल फेसबुकमार्फत आफ्नो स्वास्थ्यले साथ दिएसम्म सरकारी निवासमा पार्टीका कुनै पनि बैठक नगर्ने घोषणा उनले गरेका हुन्।
प्रधानमन्त्रीले सामाजिक सञ्जालमा लेखेका छन्, ‘शुभ बिहानी१ सामाजिक सन्जालमार्फत तपाईंहरूले दिनुभएको सुझावअनुसार मेरो स्वास्थ्यावस्थाले साथ दिएसम्म सरकारी निवास बालुवाटारमा पार्टीको बैठक नराख्ने जानकारी गराउँछु। आज हाम्रो पार्टीको सचिवालय बैठक छ। मनोहरा खोलामा आएको बाढीको डुबानले बैठक पार्टी कार्यालयमा बस्न नसक्ने भएका कारण यस पटक अन्यत्र राखिएको छ। यसरी नै मलाई सुझाव दिँदै जानुहोला। धन्यवाद१’
राजधानीस्थित एक होटलमा बिहान ११ बजे एमाले सचिवालय बैठक बस्दै छ। बैठकमा केन्द्रीय नेताहरूको कार्य विभाजन र समसायिक विषयमा छलफल हुने पार्टीका प्रचार विभाग प्रमुख राजेन्द्र गौतमले बताए। गत असार २६ गतेको सचिवालय बैठकले पार्टीका केन्द्रीय नेताहरुको कार्य विभाजन हेरफेरको निर्णय गरेको थियो।