पूर्वमन्त्री महतोले घुस दिएको घटना छानबिन गर्न समिति गठन

काठमाडौं– पूर्वमन्त्री वीरेन्द्र महतोले आफ्ना छोराको समकक्षता प्रमाणपत्र लिँदा कर्मचारीलाई ५ हजार घुस दिएको घटनाबारे यथार्थ पत्ता लगाउन शिक्षा, विज्ञान तथा प्रविधि मन्त्रालयले तीन सदस्यीय छानबिन समिति गठन गरेको छ। मन्त्रालयले शिक्षा तथा मानव स्रोत विकास केन्द्रका उपमहानिर्देशक संयोजकत्वमा तीन सदस्यीय छानबिन समिति गठन गरेको सहसचिव एवं प्रवक्ता केशवप्रसाद दाहालले बताएका हुन्।
मन्त्री महतोले छोराको समकक्षता प्रमाणपत्र लिँदा ५ हजार घुस बुझाउनुपरेको गुनासो सोमबारको प्रतिनिधिसभा बैठकमा बताएका थिए।
मन्त्रालयले समिति बनाएर सात दिनभित्र सुझावसहित प्रतिवेदन पेस गर्न भनिएको छ।
‘पाठ्यक्रम विकास केन्द्रबाट जारी हुने समकक्षताको प्रमाणपत्र प्रदान गर्दा गरिएको काम–कारबाही सम्बन्धमा उठाइएको विषयमा समकक्षताको प्रमाणपत्र लिँदा अपनाउनुपर्ने प्रक्रिया, सोमा लाग्ने दस्तुरलगायतका विषयमा आवश्यक छानबिन गर्न सात दिनको सुझावसहितको प्रतिवेदन पेस गर्न शिक्षा मानव स्रोत विकास केन्द्रका उपमहानिर्देशकको संयोजकत्वमा तीन सदस्यीय छानबिन समिति गठन गरिएको छ,’ विज्ञप्तिमा भनिएको छ।

।