बाढीपहिरोमा परेर हालसम्म १० को मृत्यु, ४ बेपत्ता

काठमाडौं। भारी वर्षासँगै आएको बाढीपहिरो र डुबानलगायत कारण नेपालका विभिन्न क्षेत्रमा अहिलेसम्म १० जनाको मृत्यु भएको छ।
प्रहरी प्रधान कार्यालयका अनुसार समाचार तयार पार्दासम्म विपद्जन्य घटनामा परेर अन्य ४ जना बेपत्ता भएका छन् भने सात जना घाइते भएका छन्।
देशभर ४५ ठाउँभन्दा बढी क्षेत्रका सडक आवागमन अवरुद्ध भएको नेपाल प्रहरीका प्रवक्ता प्रहरी नायब महानिरीक्षक दानबहादुर कार्कीले बताए। उनका अनुसार विपद्जन्य घटनामा परेर स्याङ्जामा तीन, तनहुँमा दुई, पर्वतमा दुई, काठमाडौंमा एक र काभ्रेमा खोलाले बगाएर दुईजनाको मृत्यु भएको छ ।
प्रवक्ता कार्कीले दाङमा दुई, तनहुँमा १, दोलखामा एक गरी ४ जना बेपत्ता भएका जानकारी दिए। अहिलेसम्म तनहुँ, गुल्मी ओखलढुंगामा गरेर सात जना घाइते भएको प्रहरी प्रधान कार्यालयले जनाएको छ। भारी वर्षाका कारण देशभरकै जनजीवन प्रभावित भएको छ। कोसी नारायणीलगायतका ठूला नदीमा जल सतह उच्च भएको छ भने अन्य साना खोला खहरे पनि उर्लिएको छ।
काठमाडौंसहित देशैभर वर्षा भइरहेको छ। तीनवटै सुरक्षा निकाय हाईअलर्टका साथ प्रभावित क्षेत्रमा परिचालन भई खोज तथा उद्धार जारी राखेका छन्।