७१ जिल्लामा फैलियो डेंगु, १ हजार १३० जना संक्रमित

काठमाडौं–डेंगु रोगको संक्रमण ७१ वटा जिल्लामा फैलिएको छ। गत जेठ ११ सम्म ५७ जिल्लामा फैलिएको डेंगुु हाल ७१ जिल्लामा पुगेको स्वास्थ्य तथा जनसंख्या मन्त्रालयले जनाएको हो। मन्त्रालयअन्तर्गतको इपिडिमियोलोजी तथा रोग नियन्त्रण महाशाखाका किटजन्य रोग शाखा प्रमुख डा गोकर्णप्रसाद दाहालले मौसम परिवर्तनसँगै गर्मीका कारणले डेंगु संक्रमण बढेको बताए।
उनले गर्मीमा मानिसले पानी संकलन गरेर राख्ने र संकलित पानीमा लामखुट्टे रहने भएकाले डेंगुुको जोखिम बढेको उनको भनाइ छ। ‘गर्मीमा पानी संकलन गरेर राख्ने गरिन्छ। त्यसरी संकलित पानीमा लामखुट्टेले फुल पार्दछ। सफा पानीमा त्यही लार्भा बन्ने र मानिसलाई टोक्ने गर्दछ’, उनले भने।
उनका अनुसार ७१ जिल्लामा १ हजार १३० जनामा संक्रमण देखिएको छ। गत वर्ष ७७ जिल्लामा ५१ हजार एक सय ४३ जनालाई डेंगु संक्रमण देखिएको थियो। कोसी प्रदेशमा दुई सय ७२, मधेस प्रदेशमा ३०, बागमती प्रदेशमा तीन सय ९०, गण्डकी प्रदेशमा एक सय ७५, लुम्बिनी प्रदेशमा एक सय ३२, कर्णाली प्रदेशमा १६ र सुदूरपश्चिम प्रदेशमा एक सय १५ जनामा संक्रमण देखिएको छ।