नेपाल र नेदरल्यान्डबीचको खेल टुँडिखेलमा प्रत्यक्ष प्रसारण, ५००० खेलप्रेमीको जमघट हुने
काठमाडौं– आईसीसी टी–२० विश्वकप २०२४ अन्तर्गतको नेपाल र नेदरल्यान्डबीचको खेल ओपन डोर इन्टरनटेनमेन्ट र काठमाडौँ महानगरको सहकार्यमा टुँडिखेलबाट प्रत्यक्ष प्रसारण गरिने भएको छ। प्रत्यक्ष प्रसारण कार्यक्रममा युवा तथा खेलकुद मन्त्रालयले पनि समन्वय गर्नेछ।
खेलकुद तथा युवामन्त्री विराजभक्त श्रेष्ठको उपस्थितिमा टुँडिखेलमा सांगीतिक कार्यक्रम पनि हुनेछ जसमा इन्दिरा जोशी, प्रताप दास, रचना रिमाल, महेश काफ्ले र भीयोमा अधिकारीले आफ्नो प्रस्तुति दिनेछन्।
कार्यक्रम सञ्चालन जय प्रधानले गर्नेछन् भने खाजा र खानाका लागि विभिन्न स्टल उपलब्ध हुनेछ।
ओपन डोर इन्टरनटेनमेन्टका अध्यक्ष एलिन श्रेष्ठका अनुसार आजको टुँडिखेलको प्रत्यक्ष प्रसारण नेपाली खेलकुदप्रेमीका अवीस्मरणीय क्षण हुनेछ। कम्तीमा ५ हजार नेपाली खेलकुद प्रेमीहरु टुँडिखेलमा भेला भई नेपाली क्रिकेट टोलीलाई हौसला दिनेछन्। उनले नेपाली खेलप्रेमीलाई यो कार्यक्रम गौरवका साथ मनाउन आग्रह गरे। निःशुल्क प्रवेश रहेको कार्यक्रममा ५ बजेदेखि रंगशाला प्रवेश गर्न सकिनेछ।
नेपालको टी–२० विश्वकप २०२४ अन्तर्गतको पहिलो खेल आज राती ९ः१५ बजेदेखि सुरु हुनेछ । नेपालले एक दशकपछि टी–२० विश्वकपमा भाग लिँदै छ।
