मातातीर्थमा सम्झिइँदै दिवंगत आमाहरू

काठमाडौं– आज मातातीर्थ औंसी अर्थात् आमाको मुख हेर्ने दिन। आमाप्रति श्रद्धा, भक्ति, सम्मान र आदर गरी आशीर्वाद लिएर देशैभरि मातातीर्थ औंसी मनाइँदै छ। बिहानै उठेर नुहाइधुवाइ गरी जगत् जननी आमालाई उपहार दिई तथा मिष्ठान्न खुवाएर आमाको मुख हेर्ने र आशीर्वाद थाप्ने चलन छ। आमा नभएकाहरू भने आमाको नाममा श्राद्ध गर्दै आमाको सम्झना गर्छन्। दिवंगत आमाको सम्झनामा श्राद्ध तथा दान गर्न काठमाडौंको चन्द्रगिरिमा रहेको मातातीर्थमा मेला लाग्ने गर्छ। बिहानैदेखि मातातीर्थ कुण्डमा स्नान गर्नेहरुको भीड लागेको छ। मेलामा सहभागी भई कुण्डमा दर्शन गरे आमा दिवंगत हुने छोराछोरीले आमालाई तिर्नुपर्ने ऋणबाट मुक्त हुने जनविश्वास छ।
प्रत्येक वर्ष वैशाख कृष्ण औंसीका दिन दिवंगत आमाको सम्झनामा यहाँ मेला लाग्ने गरेको छ।
कुण्ड परिसरमा दिवंगत आमाको स्मृतिमा तर्पण दिने तथा श्राद्ध गर्नेको पनि भीड लागेको छ। कुण्डमा आज माताको श्राद्ध तथा उनको सम्झनामा तर्पण एवं दान गरे पुण्य हुने विश्वास छ। यसो गरे मातृऋणबाट मुक्ति मिल्ने शास्त्रीय मान्यता छ। धर्मशास्त्रमा आमाको स्थान परमात्मा भन्दा उच्च मानिएको छ। आमालाई पण्डित, आचार्य र पिताभन्दा पनि महान् मानिएको छ। पितृऋण तिर्न माता, पितालाई जीवित हुँदा सम्मानपूर्वक खुसी राख्ने तथा मृत्युपछि श्रद्धापूर्वक श्राद्ध गर्नुपर्ने शास्त्रीय विधान छ।
आज विशेष रूपमा आमालाई सुन्दर वस्त्र लगाइदिने तथा मीठा र तागतिला खानेकुरा ख्वाएर आशीर्वाद लिने परम्परा छ।