एसीसी प्रिमियर कपः नेपालले साउदीलाई ६ विकेटले हरायो

काठमाडौं– नेपालले एसीसी प्रिमियर कप क्रिकेट प्रतियोगिताअन्तर्गत समूह चरणको अन्तिम खेलमा साउदी अरेबियालाई ६ विकेटले पराजित गरेको छ। जितसँगै नेपाल समूह चरणमा अपराजित रहँदै सेमिफाइनलमा प्रवेश गरेको हो।
ओमानको अल अमेरत खेल मैदानमा भएको आजको खेल वर्षाले प्रभावित भएपछि २० ओभरबाट ८ ओभरमा झारिएको थियो। पहिलो ब्याटिङ गरेको साउदीले नेपालसामु जितका लागि ७४ रनको लक्ष्य दिएको थियो।
साउदीले दिएको लक्ष्य नेपालले ७।२ ओभरमा ४ विकेटको क्षतिमा पूरा गर्यो। नेपालका लागि अविजित ३२ रन बनाएका गुलसन झाले १९ बल खेल्ने क्रममा २ छक्का र २ चौका प्रहार गरे।
दीपेन्द्रसिंह ऐरीले १७ र कप्तान रोहित पौडेलले १६ रन बनाए भने अन्य ब्याटरले दोहोरो अंकमा रन बनाउन सकेनन्।
साउदीका लागि इस्तिक अहमदले दुई विकेट लिए भने उसमान नाजीव र वाजी उल हसनले एक–एक विकेट लिए।
टस हारेर पहिले ब्याटिङ गरेको साउदीले निर्धारित ८ ओभरमा ७ विकेटको क्षतिमा ७३ रन बनाएको थियो। उसका लागि अब्दुल वाहिदले सर्वाधिक ३७ रन बनाए। उनले १६ बल खेल्ने क्रममा ३ छक्का र ३ चौका प्रहार गरे। त्यसबाहेक अन्य ब्याटरले दोहोरो अंकमा रन बनाउन सकेनन्।
नेपालका लागि करन केसी र अभिनाश बोहराले २–२ विकेट लिए भने प्रतीष जिसी र ललित राजवंशीले १–१ विकेट लिए।
समूह ‘ए’मा रहेको नेपालले पहिलो खेलमा मलेसियालाई ५ विकेट, दोस्रो खेलमा कतारलाई ३२ रन र तेस्रो खेलमा हङकङलाई ८ विकेटले पराजित गरेको थियो।