पशुपतिमा संकटमोचक हनुमानलाई ११११ केजी लड्डुको महाभोग र ११११ दीप प्रज्वलन गरिने

काठमाडौं। नयाँ वर्ष २०८१ एवं नवरात्रि चैत्र पूर्णिमा अवसरमा पशुपति देवपतनस्थित भष्मेश्वर पञ्च दशनाम जुवा अखडा परिसरमा हनुमान जन्मोत्सव अवसरमा आगामी वैशाख ११ गते चैत्र पूर्णिमाको दिन संकट मोचक हनुमानजीको शुद्ध गंगाजल, शुद्ध घ्युद्वारा निर्मित ११११ किलोको लड्डुको महाभोग लगाइने र ११११ दीप प्रज्वलन गरिने भएको छ। महन्त रतन गिरि एवं स्थानीयवासीको पहलमा हनुमानजीको शुद्ध गंगाजल, शुद्ध घ्युद्वारा निर्मित ११११ किलोको लड्डुको महाभोग लगाइने र ११११ दीप प्रज्वलन गरिने भएको हो।
आयोजकका अनुसार पशुपति क्षेत्रभित्र रहेका मुख्य मठमन्दिर अखडामा ११–११ किलोको एक–एक लड्डु गाजाबाजासहित भेला भएर भोग लगाइनेछ। हरिद्वारबाट ल्याइने ११११ लिटर गंगाजल भगवान् पशुपतिनाथको स्नानका अर्पण गरिनेछ। यस्तै, पशुपति क्षेत्रभित्रका समस्त शिवालय र मठमन्दिरमा गंगाजल स्नान गराइने भएको छ। वैशाख १० देखि ११ गतेसम्म संकट मोचन हनुमानको अखण्ड पाठ लगाइने आयोजकले बताएका छन्। वैशाख ११ गते बिहान हनुमानको विशेष पूजाअर्चना र हवन गरिनेछ भने वैशाख ११ गते सन्ध्या आरतीमा ११११ दीप प्रज्वलित गरिनेछ।