तीन साता बन्द हुँदै रिडी–तम्घास सडक

काठमाडौं– मदन भण्डारी राजमार्गअन्तर्गत रिडी–तम्घास सडक आजदेखि तीन सातासम्म बन्द हुने भएको छ। राजमार्ग योजना कार्यालयले सार्वजनिक सूचना निकालेर रिडी–तम्घास खण्डमा सडक विस्तारको काम भइरहेकाले तीन सातालाई वैकल्पिक मार्ग प्रयोग गर्न आग्रह गरेको छ। सडक निर्माणका क्रममा पहरो फोर्ने, चौडा पार्ने, ग्रेड मिलाउनेलगायत काम गर्नुपर्ने भन्दै कार्यालयले ७ चैतदेखि चैत मसान्तसम्म सडक बन्द हुने मदन भण्डारी राजमार्ग योजना कार्यालयका इन्जिनियर एवं सूचना अधिकारी शर्मिला शर्माले जानकारी दिइन्।
उनले तीन साताका लागि आज बिहान १० देखि ४ बजेसम्म र राती १० देखि बिहान ४ बजेसम्म सडक बन्द रहने बताइन्। गुल्मीका प्रमुख जिल्ला अधिकारी कृष्णप्रसाद शर्मा अध्यक्षताको बैठकले हाल तीन सातालाई सडक बन्द गर्ने निर्णय गरेको हो। मुख्य सडक बन्द भएपछि वैकल्पिक सडकका लागि पानीट्यांकी–थोर्गा–स्यालपोखरी–सालबिसौनीबाट रातामाटा, पीपलनेटा दिगाम हुँदै रिडी र लुम्छा–धरमपानी–दिगाम हुँदै रिडी तथा घुम्तीबाट चारपाला–खज्र्याङ हुँदै रिडी सडक प्रयोग गर्न कार्यालयले सार्वजनिक सूचना जारी गरेको छ। रिडी–तम्घास सडक खण्डको २५ किलोमिटर क्षेत्रमा सडक निर्माण द्रुतगतिमा भइरहेको छ।–