टी–२० विश्वकप सुरु, पहिलो खेलमा श्रीलंका नामिबियासँग पराजित
टी–२० विश्वकप क्रिकेटको उद्घाटन खेलमा श्रीलंका नामिबियासँग ५५ रनले पराजित भएको हो
एजेन्सी
काठमाडौं– अस्ट्रेलियामा आठौं संस्करणको टी–२० विश्वकप सुरु भएको छ । १६ टोली सहभागी हुने प्रतियोगिता दुई चरणमा हुनेछ । पहिलो चरणअन्तर्गत आज समूह ‘ए’का दुई खेल हुनेछन् ।श्रीलंका र नामिबियाबीच भएको पहिलो खेलमा एसिया कप विजेता श्रीलंकाले पराजय बेहोरेको छ ।
टी–२० विश्वकप क्रिकेटको उद्घाटन खेलमा श्रीलंका नामिबियासँग ५५ रनले पराजित भएको हो।१६४ रनको लक्ष्य पछ्याएको श्रीलंका १९ ओभरमा अलआउट हुँदै १०८ रनमा समेटियो । श्रीलंकाका लागि दासुन सानाकाले सर्वाधिक २९ रन बनाए ।यस्तै, भानुका राजपाक्षेले २० रन बनाउँदा धनन्जयले १२ र महेश तेक्षेणाले ११ रन बनाए । बाँकी कुनै पनि ब्याटरले दोहोरो अंकमा रन बनाउन सकेनन् ।
श्रीलंकालाई सस्तैमा रोक्न नामिबियाका डेभिड वाइज, बनार्ड स्कोल्टज, बेन शिकागो र यान फ्रायलिंकले २–२ विकेट लिए । जेजे स्मिटले १ विकेट हात पारे ।त्यसअघि सायमन्ड स्टेडियम जिलाङ्समा टस हारेर पहिले ब्याटिङ गरेको नामिबियाले निर्धारित २० ओभरमा ७ विकेट गुमाउँदै १६३ रन बनाएको थियो ।उसका लागि यान फ्रायलिंकले सर्वाधिक ४४ रन बनाएका थिए । स्टेफन बर्डले २६ रन बनाउँदा यान निकोल र कप्तान एरार्ड इरास्मसले २०–२० रन बनाए
श्रीलंकाका लागि प्रमोद मधुशानले २ तथा महेश तेक्षाना, दुसमान्था चमेरा, चमिका करुणारत्ने र वाइन्डु हसरंगाले १–१ विकेट लिए । दोस्रो खेल नेदरल्यान्ड र युएईबीच भइरहेको छ ।पहिलो चरणको समूह एमा नामिबिया, श्रीलंका, नेदरल्यान्ड्स र युएई छन्। समूह बीमा आयरल्यान्ड, जिम्बावे, वेस्टइन्डिज र स्कटल्यान्ड छन् । पहिलो चरणका दुबै समूहका शीर्ष दुई टोली सुपर १२ मा पुग्नेछन्।
पहिलो चरणको खेलपछि मात्रै सुपर १२ को खेल हुनेछन् । सुपर १२ को समूह १ मा इंग्ल्यान्ड, न्युजिल्यान्ड, अष्ट्रेलिया, अफगानिस्तानसँगै पहिलो चरणको समूह ए को विजेता र समूह बीको उपविजेता हुनेछन् ।सुपर १२ को समूह २ मा भारत, पाकिस्तान, दक्षिण अफ्रिका, बंगलादेशसँगै पहिलो चरणको समूह बीको विजेता र समूह एको उपविजेता हुनेछन् ।
सुपर १२ मा दुवै समूहका शीर्ष दुई दुई टोली सेमिफाइनलमा पुग्नेछन् । टी२० विश्वकपमा हालसम्म ७ संस्करण सकिँदा ६ टोली च्याम्पियन बनिसकेका छन् । दुई पटक विश्वकप जित्ने एक मात्र टोली वेस्टइन्डिज हो ।
