नेपालमा कम्युनिस्टबाहेक अन्य पार्टीको भविष्य छैन : नेता नेपाल
काठमाडौं– नेपाल कम्युनिस्ट पार्टी एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले एमाले अध्यक्ष केपी ओलीको अत्याचारविरुद्ध नयाँ पार्टी खोल्नुपरेको बताएका छन् । नेकपा एस निकट उपत्यका युवा विशेष जिल्ला कमिटीले शनिबार काठमाडौंमा आयोजना गरेको कार्यक्रममा नेता नेपालले यस्तो बताएका हुन् ।
ओलीले संविधान कुल्चिएको, संसद् विघटन गरेको सहेर बस्ने वा विद्रोह गर्ने भन्ने सवालमा दोस्रो विकल्प रोजेको उनको भनाइ छ ।ओलीसँग बसिरहनुको विकल्प नभएको र आत्मसमर्पण गर्न नसक्दाको परिणाम नयाँ पार्टी जन्मिएको उनले दाबी गरे । ‘हामी एमालेमै रहेर हरिविजोग भोग्न चाहँदैनौं थियौं । यही कारण नेपालको राजनीतिमा हाम्रो उपस्थिति देखाइछाड्यौं,’ नेता नेपालले भने ।
अहिले नेकपा एसको ७७ वटै जिल्लामा संगठन विस्तार भएको र अझै पनि संगठनलाई फैलाउन लागिपरेको उनले बताए ।केही नेताका कारण अहिले पार्टी व्यवस्थाप्रति जनताको विश्वास घट्दै गएको नेता नेपालको धारणा छ । नेताहरूको भ्रष्टाचारी व्यवहार र राज्यसत्ताको दुरुपयोगका कारण जनतामा दलीय व्यवस्थाप्रति विश्वास घटेको उनले बताए ।कार्यक्रममा उनले कम्युनिस्टबाहेक अन्य पार्टीको भविष्य नरहेको ठोकुवा गरे ।
