१० पुसदेखि खुल्ने भए सिनेमा घर

नेपाल चलचित्र संघले आउँदो १० पुसदेखि सिनेमा हल खोल्ने निर्णय गरेको छ ।
संघले नेपाल सरकारको स्वास्थ्य सुरक्षा विधि तथा विश्व स्वास्थ्य संगठनको सुरक्षा मापदण्ड अपनाई चलचित्र घर सञ्चालन गर्ने बताएको हो ।
सरकारसँग पटक–पटक आग्रह गर्दा हल खोल्ने कुनै नीति निर्णय नआएपछि सिनेमाकर्मीहरुले हल सञ्चालन गर्ने निर्णय गरेका हुन् ।
संघले विज्ञप्ति सार्वजनिक गर्दै सरकारलाई बुदाँगत रुपमा दबाब दिएको छ । संघले हवाई, बस व्यवसाय, होटल, रेस्टुराँ, मन्दिरलगायत सबै क्षेत्र पूर्ण रुपमा सञ्चालन भइसके पनि सिनेमा घर सञ्चालनका लागि सरकारबाट केही कदम नचालिएको भन्दै गुनासो गरेको छ ।
संघले १० पुसदेखि चरणबद्ध रुपमा आन्दोलन गर्ने निर्णयसमेत गरेको छ । मनोरञ्जन कर खारेज गर्ने, चलचित्र प्रदर्शन व्यवसायले उद्योगको मान्यता पाउनुपर्ने, चलचित्र विकास शुल्क खारेज हुनुपर्ने, चलचित्र घरका लागि आवश्यक उपकरण तथा सामग्रीको भन्सार महसुल छुट हुनुपर्ने, चलचित्र क्षेत्रलाई अति प्रभावित क्षेत्रको रुपमा सम्बोधन गर्नुपर्ने माग राखिएको छ ।
सरकारले ९ महिनापछि फिल्म छायाकन फुकुवा गरेको छ । सोमबार फिल्म निर्माता संघका अध्यक्ष आकाश अधिकारीसँगको भेटमा उपप्रधानमन्त्री ईश्वर पोखरेल तथा सूचना तथा सञ्चारमन्त्री पार्वत गुरुङले यसै साता पत्रकार सम्मेलनबाट छायाँकन खुलाउने बताएका हुन् ।
संघका अध्यक्ष अधिकारीले दुई मन्त्रीसँगको भेटका तस्बिर सामाजिक सञ्जाल फेसबुकमा पोस्ट गर्दै छायाँकन स्थल खुल्ला गरिन लागेको बारे जानकारी गराएका हुन् । फिल्म हल भने सरोकारवाला संघसंस्थासँग छलफल गरेर मात्र खोल्ने जानकारी प्राप्त भएको बताए । फिल्मकर्मीले माग राख्दै आएको फिल्म क्षेत्रलाई अति प्रभावित क्षेत्रमा सूचीकृत गर्नेमा पनि सहमती भएको अधिकारीले सामाजिक सञ्जालमा उल्लेख गरेका छन् । भेटमा अभिनेता शिव श्रेष्ठ पनि उपस्थित थिए ।