नेपाल आउँदै भारतीय विदेश सचिव
भारतको सीमा अतिक्रमणको विवादले दुई मुलुकबीचको सम्बन्ध चिसो भइरहेका बेला भारतीय विदेश सचिव हर्षवद्र्धन श्रींगलाले आउँदो ११ र १२ मंसिरमा दुईदिने नेपाल भ्रमण गर्ने भएका छन् ।
पराराष्ट्र मन्त्रालयले सोमबार विज्ञप्ति निकालेर परराष्ट्र सचिव भरतराज पौडेलको निमन्त्रणमा उनी दुई दिने औपचारिक भ्रमणमा आउन लागेको जानकारी दिएको हो ।
मन्त्रालयले भ्रमणलाई दुई देशबीचमा उच्च स्तरमा भइरहेको भ्रमणको आदान प्रदानकै निरन्तरता भएको बताएको छ ।
भ्रमणको पहिलो दिन दुई देशका परराष्ट्र सचिवले दुईपक्षीय विषयहरूमा वार्ता गर्नेछन् । सोही दिन श्रींगलाले उच्चस्तरीय भेटघाट गर्ने मन्त्रालयले जानकारी दिएको छ ।
भारतीय विदेश मन्त्रालयले प्रेसविज्ञप्ति प्रकाशित गरेर विदेश सचिव भएपछि उनको यो पहिलो नेपाल भ्रमण भएको उल्लेख गरेको छ । विज्ञप्तिमा भनिएको छ, ‘भ्रमणको दौरानमा उनले नेपाली समकक्षी र अन्य उच्च व्यक्तिहरूसँग भेटघाट गर्नेछन् । भेटमा दुईपक्षीय सहकार्यका विभिन्न क्षेत्रबारे कुराकानी हुनेछ ।’
भारतीय विदेश मन्त्रालयले यो परम्परादेखि उच्च तहमा हुँदै आएको भ्रमण आदान–प्रदान र भारतको नेपालसँगको उच्च सम्बन्धको निरन्तरता भएको बताएको छ ।
भारतीय विदेश मन्त्रालयले अगाडि भनेको छ, ‘भारत र नेपालको बीचमा ऐतिहासिक र सांस्कृतिक सम्बन्ध रहँदै आएको छ । पछिल्लो समयमा दुईपक्षीय सम्बन्ध सुदृढ भएको छ । भारतको सहयोगमा धेरै पूर्वाधार र सीमापार परियोजना सञ्चालन भइरहेका छन् ।’
